TDP: ఈ డ్రామాలో హీరో జగన్‌.. సైడ్‌ హీరో వెలంపల్లి: తెదేపా నేత పట్టాభి

అమరావతి: సీఎం జగన్‌పై జరిగిన రాయి దాడి డ్రామాకు తాడేపల్లి ప్యాలెస్‌లో ముందే స్క్రిప్ట్‌ రాశారని తెదేపా నేత కొమ్మారెడ్డి పట్టాభిరామ్‌ ఆరోపించారు. ఈ డ్రామాలో హీరో జగన్‌, సైడ్‌ హీరో ఎమ్మెల్యే వెలంపల్లి అని ఎద్దేవా చేశారు. ఎవరి పాత్రలను వారు అద్భుతంగా పోషించారన్నారు. తెదేపా కేంద్ర కార్యాలయంలో నిర్వహించిన మీడియా సమావేశంలో ఆయన మాట్లాడారు. ఎన్నికల్లో సానుభూతి పొందేందుకు దాడి చేయించుకుని తెదేపాపై బురదజల్లుతున్నారని మండిపడ్డారు. 

‘‘ప్రజల ఛీత్కారాలతో ఎన్నికల్లో ఓటమి తప్పదని గ్రహించే సానుభూతి కోసం కోడికత్తి తరహాలో డ్రామా ఆడారు. సీఎం కాన్వాయ్‌లో అంబులెన్స్‌ ఉన్నప్పుడు అక్కడికి తీసుకెళ్లకుండా బస్సులోకి ఎందుకు తీసుకెళ్లారు?అందులో కూర్చోబెట్టి ప్లాస్టర్‌ వేస్తున్న దృశ్యాలను ప్రసారం చేశారు కానీ.. అంబులెన్స్‌ను ఎందుకు ఉపయోగించుకోలేదు? దీనికి సమాధానం చెప్పాలి’’ అని పట్టాభి డిమాండ్‌ చేశారు.