TDP: ఆర్టీసీ బస్సులకు తెదేపా నేతల దరఖాస్తు.. తిరస్కరించిన అధికారులు

తాడేపల్లిగూడెం: పశ్చిమగోదావరి జిల్లా తాడేపల్లిగూడెం వేదికగా బుధవారం తెదేపా-జనసేన తొలి ఉమ్మడి భారీ బహిరంగ సభ జరగనుంది. ఈ నేపథ్యంలో సభకు బస్సులు కేటాయించాలని ఆర్టీసీని తెదేపా నాయకులు కోరారు. 100 బస్సులు కావాలని పాలకొల్లు ఎమ్మెల్యే నిమ్మల రామానాయుడు, 50 బస్సుల కోసం ఉండి ఎమ్మెల్యే మంతెన రామరాజు దరఖాస్తు చేశారు. వారి అభ్యర్థనను అధికారులు నిరాకరించారు. దీంతో ప్రభుత్వం ఒక్క బస్సు కూడా కేటాయించలేదని నేతలు మండిపడ్డారు. చేసేదిలేక ఇరుపార్టీల శ్రేణులు సొంత వాహనాల్లోనే సభకు భారీగా తరలివచ్చేందుకు సిద్ధమయ్యారు. లక్షలాదిగా తరలివచ్చే సభకు తగిన బందోబస్తు ఏర్పాటు చేయడంలో ప్రభుత్వం విఫలమైందని నేతలు ఆగ్రహం వ్యక్తం చేశారు. భద్రత విషయంలో ఇబ్బందులు తలెత్తే విధంగా అధికారులు వ్యవహరిస్తున్నారని ధ్వజమెత్తారు.