Telangana News: భాజపా, కాంగ్రెస్‌ శ్రేణులపై లాఠీఛార్జి.. హనుమకొండలో ఉద్రిక్తత

హనుమకొండ: హనుమకొండలోని భాజపా జిల్లా కార్యాలయం వద్ద తీవ్ర ఉద్రిక్తత చోటు చేసుకుంది. అగ్నిపథ్‌కు వ్యతిరేకంగా భాజపా కార్యాలయం వద్ద కాంగ్రెస్‌ ధర్నా చేపట్టింది. దీనిపై స్పందించిన భాజపా శ్రేణులు.. కాంగ్రెస్‌ కార్యకర్తలను అడ్డుకున్నారు. ఈక్రమంలో ఇరువర్గాల మధ్య వాగ్వాదం, ఘర్షణ జరిగింది. ఆగ్రహించిన భాజపా శ్రేణులు కాంగ్రెస్‌    నాయకుల వాహనాలపై దాడి చేశారు. ఇరువర్గాల పరస్పర దాడులతో హనుమకొండ భాజపా కార్యాలయం వద్ద పరిస్థితి ఉద్రిక్తంగా మారింది. రంగంలోకి దిగిన పోలీసులు లాఠీఛార్జి చేసి ఇరువర్గాలను చెదరగొట్టారు. దాడిలో పలు కార్ల అద్దాలు ధ్వంసమయ్యాయి. భాజపా కార్యాలయం వద్దకు వచ్చి కాంగ్రెస్‌ శ్రేణులు నిరసనకు దిగడాన్ని భాజపా నాయకులు తీవ్రంగా ఖండించారు.