Bhuma Akhila Priya: భూమా అఖిలప్రియను అడ్డుకున్న వైకాపా నేతలు.. యర్రగుంట్లలో ఉద్రిక్తత

శిరివెళ్ల: మాజీ మంత్రి, ఆళ్లగడ్డ తెదేపా అభ్యర్థి భూమా అఖిలప్రియను వైకాపా నేతలు అడ్డుకున్నారు. వివరాల్లోకి వెళితే.. ‘మేమంతా సిద్ధం’ బస్సుయాత్రలో భాగంగా ఆళ్లగడ్డలో సీఎం జగన్‌ పర్యటిస్తున్నారు. దీనిలో భాగంగా ఆళ్లగడ్డలో రైతులతో ఆయన ముఖాముఖి నిర్వహించారు. అన్నదాతల సమస్యలపై సీఎంకు వినతిపత్రం అందించేందుకు భూమా అఖిలప్రియ అక్కడికి బయల్దేరారు. ఈ క్రమంలో ఆమెను యర్రగుంట్ల వద్ద వైకాపా నేతలు, పోలీసులు అడ్డుకున్నారు.  దీంతో ఇరువర్గాల మధ్య వాగ్వాదం చోటుచేసుకోవడంతో ఉద్రిక్తత తలెత్తింది. ఈ ఘటనపై అఖిలప్రియ శిరివెళ్ల పోలీసుస్టేషన్‌లో ఫిర్యాదు చేశారు. వినతిపత్రం అందించేందుకు వెళ్తే వైకాపా నేతలు దాడి చేశారని అందులో పేర్కొన్నారు.