MS Dhoni: ఆ విషయంలో ధోనీ అందరి అంచనాలను తల్లకిందులు చేశాడు: డివిలియర్స్‌

ఇంటర్నెట్‌డెస్క్: కెప్టెన్‌ కూల్‌ ధోనీ (MS Dhoni) ఐపీఎల్‌ భవిష్యత్తుపై మిస్టర్‌ 360 ఏబీ డివిలియర్స్‌ (Ab de Villiers ) ఆసక్తికర వ్యాఖ్యలు చేశాడు. మహీ ఐపీఎల్‌ జైత్రయాత్ర అంచనాలకు మించి సాగుతోందన్నాడు. తాజాగా తన యూట్యూబ్‌ ఛానల్‌లో మాట్లాడుతూ..‘‘చెన్నై కొనసాగించిన ఆటగాళ్ల జాబితాలో ధోనీ పేరును చూసి సంతోషించాను. గత సీజనే ధోనీకి చివరిదయ్యే అవకాశం ఉందని భారీగా ప్రచారం జరిగింది. అతడు 2024 ఐపీఎల్‌ సీజన్‌ ఆడేందుకు సిద్ధమయ్యాడు. అతడు ఎప్పుడూ ఆశ్చర్యపరుస్తుంటాడు. ఎవరికి తెలుసు..? అతడు మరో మూడు సీజన్ల కంటే ఎక్కువ ఆడతాడమేమో. ఆ సీజన్లలో అతడి పేరు చూడాలన్నది ఆకాంక్ష మాత్రమే’’ అని డివిలియర్స్‌  పేర్కొన్నాడు.

‘టీ20 ప్రపంచకప్‌ ఉన్న ఈ తరుణంలో’.. కోచ్‌గా ద్రవిడ్‌ కొనసాగింపుపై గంభీర్‌ స్పందన

ఇక పంజాబ్‌ విడుదల చేసిన ఆటగాడు షారుఖ్‌ ఖాన్‌ ఆర్సీబీ సొంతం చేసుకోవచ్చనే అంశంపై మాట్లాడతూ.. అతడు (షారుఖ్‌ ఖాన్‌) స్థిరంగా రాణిస్తున్న బలమైన ఆటగాడన్నాడు. మాతోపాటు అతడిని కొనుగోలు చేయడానికి చాలా జట్లు పోటీపడవచ్చని అంచనావేశాడు. ఈ విషయంలో సీఎస్‌కేతో పోటీ ఉండొచ్చని డివిలియర్స్‌ పేర్కొన్నాడు. 

సూపర్‌ కింగ్స్‌కు ఆరోసారి ఐపీఎల్‌ టైటిల్‌ను అందించేందుకు 2023 సీజన్‌లో ధోనీ విపరీతంగా శ్రమించాడు. ఆ లీగ్‌ సమయంలో ధోనీ మోకాలి సమస్యలతో ఇబ్బంది పడుతున్నాడు. 16 మ్యాచ్‌ల్లో 184 స్ట్రైక్‌ రేట్‌తో 104 పరుగులు చేశాడు. అప్పట్లోనే తాను మరో ఐపీఎల్‌లో ఆడేందుకు వస్తానని ధోనీ ప్రకటించాడు.  ప్రస్తుతం మోకాలి గాయానికి శస్త్రచికిత్స చేయించుకుని కోలుకున్నాడు. వచ్చే ఐపీఎల్ సీజన్‌ కోసం సమాయత్తమవుతున్నాడు.