Delhi Vs Hyderabad: దిల్లీపై హైదరాబాద్‌ భారీ విక్టరీ.. నమోదైన రికార్డులివీ..!

ఇంటర్నెట్ డెస్క్‌: హైదరాబాద్‌ బ్యాటర్లు మరోసారి విజృంభించారు. దిల్లీని వారి సొంతమైదానంలో చిత్తు చేయడంలో కీలక పాత్ర పోషించారు. మరోసారి ఐపీఎల్‌లో రికార్డు స్కోరును నమోదు చేశారు. తొలుత బ్యాటింగ్‌ చేసిన హైదరాబాద్ 266/7 స్కోరు చేయగా.. అనంతరం లక్ష్య ఛేదనలో దిల్లీ 199 పరుగులకు ఆలౌటైంది. దీంతో పాయింట్ల పట్టికలో హైదరాబాద్ రెండో స్థానానికి చేరుకుంది. ఈ మ్యాచ్‌ సందర్భంగా నమోదైన రికార్డులు ఇవీ.. 

• అర్ధశతకానికి హెడ్‌ ఆడిన బంతులు 16. సన్‌రైజర్స్‌ తరపున అత్యంత వేగవంతమైన అర్ధసెంచరీ రికార్డు (ఈ సీజన్‌లోనే ముంబయిపై అభిషేక్‌)ను హెడ్‌ సమం చేశాడు.
• పవర్‌ప్లేలో సన్‌రైజర్స్‌ 24 బౌండరీలు కొట్టింది. పురుషుల టీ20ల్లో ఇదే ప్రపంచ రికార్డు. శ్రీలంక రికార్డు (2014లో ససెక్స్‌పై 20) కనుమరుగైంది. తొలి ఆరు ఓవర్లలో సన్‌రైజర్స్‌ 11 సిక్సర్లు కొట్టడమూ రికార్డే.
• 100 పరుగులు దాటేందుకు సన్‌రైజర్స్‌కు అవసరమైన ఓవర్లు 5. పురుషుల టీ20ల్లో అత్యంత వేగంగా ఆ ఘనత సాధించిన జట్టుగా సన్‌రైజర్స్‌ నిలిచింది. గత రికార్డు దక్షిణాఫ్రికా (2023లో వెస్టిండీస్‌పై 5.3 ఓవర్లలో) పేరు మీద ఉంది. అలాగే తక్కువ ఓవర్ల (8.4)లో 150 పరుగులు చేసిన రికార్డు కూడా సన్‌రైజర్స్‌దే.  
• పవర్‌ప్లేలో 125 పరుగులను సన్‌రైజర్స్‌ చేసింది. పురుషుల టీ20ల్లో పవర్‌ప్లేలో నమోదైన అత్యధిక స్కోరు ఇదే. నాటింగ్‌హమ్‌షైర్‌ (2017లో డర్హంపై 106) రికార్డును సన్‌రైజర్స్‌ తిరగరాసింది.
• తొలి పది ఓవర్లలో సన్‌రైజర్స్‌ స్కోరు 158/4. ఐపీఎల్‌లో పది ఓవర్లలో అత్యధిక స్కోరు చేసిన జట్టుగా తన రికార్డు (ముంబయిపై 148)ను సన్‌రైజర్స్‌ మెరుగుపర్చుకుంది.
• 15.. అర్ధసెంచరీకి ఫ్రేజర్‌ ఆడిన బంతులు. ఈ సీజన్‌లో ఇదే వేగవంతమైన అర్ధసెంచరీ. దిల్లీ తరపున మోరిస్‌ (17) రికార్డును అతను బద్దలుకొట్టాడు. ఓవరాల్‌గా ఐపీఎల్‌లో ఇది మూడో వేగవంతమైన అర్ధశతకం. యశస్వి (13), కేఎల్‌ రాహుల్‌, కమిన్స్‌ (14) ముందున్నారు.