Lionel Messi: టైమ్‌ మ్యాగజైన్‌ ‘అథ్లెట్‌ ఆఫ్‌ ది ఇయర్‌’గా మెస్సీ

ఇంటర్నెట్‌డెస్క్‌: అర్జెంటీనా ఫుట్‌బాల్‌ స్టార్‌ లియోనల్‌ మెస్సీ (Lionel Messi) మరో అరుదైన గౌరవాన్ని అందుకున్నాడు. టైమ్‌ మ్యాగజైన్‌ ‘అథ్లెట్‌ ఆఫ్‌ ది ఇయర్‌’గా ఎంపికయ్యాడు. మెస్సీ ఈ ఏడాది జులైలో మియామి క్లబ్‌లో చేరాడు. మొత్తం 14 గేమ్స్‌ ఆడి 11 గోల్స్‌ కొట్టి జట్టును తొలిసారి లీగ్‌ విజేతగా నిలిపాడు. ‘‘గతంలో అసాధ్యంగా కనిపించిన వాటిని ఈ ఏడాది మెస్సీ సుసాధ్యం చేసి చూపించాడు. అతడు ఇంటర్‌ మియామి జట్టుకు సంతకం చేసి అమెరికాను ఏకంగా సాకర్‌ దేశంగా మార్చేశాడు’’ అని టైమ్‌ ఓ ప్రకటనలో పేర్కొంది.

ధోనీలాంటి కెప్టెనే రోహిత్.. వారికి ఎల్లవేళలా అండగా ఉంటాడు: శ్రీశాంత్

మెస్సీ రాకతో ఎంఎల్‌ఎస్‌ టోర్నీ వీక్షకుల సంఖ్య గణనీయంగా పెరిగిందని టైమ్‌  తెలిపింది. దీంతోపాటు టికెట్‌ ధరలు, విక్రయాలు కూడా బాగా పెరిగాయని పేర్కొంది. టైమ్‌ నుంచి గతంలో ఈ అవార్డు అందుకొన్న మైకెల్‌ ఫెల్ప్స్‌ (స్విమ్మింగ్‌), సిమోన్‌ బైల్స్‌ (జిమ్నాస్టిక్స్‌) వంటి వారి సరసన మెస్సీ చేరాడు.

గతంలో పారిస్‌ సెయింట్‌ జర్మన్‌ క్లబ్‌కు ప్రాతినిధ్యం వహించిన మెస్సీ.. ఆ కాంట్రాక్టు ముగియగానే తన పుట్టిల్లు వంటి బార్సిలోనా క్లబ్‌లో తిరిగి చేరాలని భావించాడు. కానీ, అతడి ప్రణాళికలు ఫలించలేదు. దీంతో మియామి లేదా సౌదీ లీగ్‌లో ఆడాలని నిర్ణయించుకొన్నాడు. ఈ నేపథ్యంలో 20 మిలియన్‌ డాలర్లకు మియామి ఒప్పందం చేసుకొంది. రిటైర్మెంట్‌ తర్వాత ఈ క్లబ్‌ యాజమాన్య వాటాలో కొంత భాగం అతడికి కేటాయించేలా ఒప్పందం జరిగినట్లు కథనాలు వెలువడ్డాయి.

ఇటీవలే ఎనిమిదో సారి బాలన్‌ డి ఓర్‌ అవార్డును మెస్సీ దక్కించుకొన్నాడు. 2022-23కు గానూ ఉత్తమ ప్రదర్శన కనబర్చడంతోపాటు ఖతర్‌ వేదికగా జరిగిన ఫుట్‌బాల్‌ ప్రపంచకప్‌లో తన జట్టును గెలిపించిన మెస్సీనే ఈ అవార్డు అందుకున్నాడు. అత్యధిక సార్లు (8) ఈ అవార్డు అందుకున్న ఆటగాడిగానూ రికార్డు సృష్టించాడు. అత్యధిక బాలన్‌ డి ఓర్‌ అవార్డు పొందిన వారిలో క్రిస్టియానో రొనాల్డో(5) రెండో స్థానంలో ఉన్నాడు.