Delhi vs Chennai: హ్యాట్రిక్‌పై కన్నేసిన చెన్నైకి ఝలక్‌.. ఖాతా తెరిచిన దిల్లీ

విశాఖపట్నం: ఐపీఎల్‌ 2024లో దిల్లీ (Delhi) జట్టు ఎట్టకేలకు ఖాతా తెరిచింది. విశాఖ వేదికగా చెన్నై (Chennai)తో జరిగిన మ్యాచ్‌లో ఆ జట్టు 20 పరుగుల తేడాతో విజయం సాధించింది. తొలుత బ్యాటింగ్‌లో 191 పరుగులు చేసిన దిల్లీ.. అనంతరం బౌలింగ్‌లో చెన్నైని 171 పరుగులకే కట్టడి చేసింది. ఆ జట్టులో రహానె (45: 30 బంతుల్లో 5 ఫోర్లు, 2 సిక్స్‌లు) టాప్‌ స్కోరర్‌. చివర్లో ధోనీ (37*; 16 బంతుల్లో 4 ఫోర్లు, 3 సిక్స్‌లు) మెరుపులు మెరిపించినా జట్టును విజయతీరాలకు చేర్చలేకపోయాడు. ఓపెనర్లు రుతురాజ్ గైక్వాడ్ (1), రచిన్ రవీంద్ర (2) ఘోరంగా విఫలమవడం చెన్నైకి ప్రతికూలంగా మారింది. డారిల్ మిచెల్ (34; 26 బంతుల్లో 1 ఫోర్‌, 2 సిక్స్‌లు) రాణించాడు. శివమ్ దూబె (18), రవీంద్ర జడేజా (21*) పరుగులు చేశారు. దిల్లీ బౌలర్లలో ముకేశ్‌ కుమార్‌ 3, ఖలీల్‌ అహ్మద్‌ 2, అక్షర్‌ పటేల్‌ ఒక వికెట్‌ తీశారు. 

టాస్‌ గెలిచి తొలుత బ్యాటింగ్‌ చేసిన దిల్లీ నిర్ణీత 20 ఓవర్లలో 5 వికెట్ల నష్టానికి 191 పరుగులు చేసింది. ఓపెనర్లు వార్నర్‌ (52: 35 బంతుల్లో 5 ఫోర్లు, 3 సిక్స్‌లు), పృథ్వీ షా (43: 27 బంతుల్లో 4 ఫోర్లు, 2 సిక్స్‌లు) తొలి వికెట్‌కు 93 పరుగుల భాగస్వామ్యం అందించారు. స్వల్ప తేడాతో వీరిద్దరూ ఔటైనప్పటికీ.. మార్ష్‌ (18) సహాయంతో పంత్‌ (51: 32 బంతుల్లో 4 ఫోర్లు, 3 సిక్స్‌లు) అర్ధశతకంతో చెలరేగాడు. దీంతో దిల్లీ భారీ స్కోర్‌ నమోదు చేసింది. చెన్నై బౌలర్లలో పతిరన మూడు వికెట్లు తీయగా, ముస్తాఫిజుర్‌, జడేజా తలో వికెట్‌ తీశారు. 

మ్యాచ్‌ విశేషాలు

• ఈ సీజన్‌లో ధోనీ బ్యాటింగ్‌కు దిగడం ఇదే తొలిసారి. 
• రోడ్డు ప్రమాదంలో గాయపడిన తర్వాత మొదటిసారి ఐపీఎల్ ఆడుతున్న రిషభ్‌ పంత్ హాఫ్‌ సెంచరీ చేయడం ఇదే మొదటిసారి. 
• ఈ సీజన్‌లో దిల్లీ ఓపెనర్ పృథ్వీ షాకు ఇది మొదటి మ్యాచ్‌. ఆడిన ఫస్ట్ మ్యాచ్‌లోనే ధనాధన్ ఆటతీరుతో అలరించాడు.