Breaking | Feedback | ePratibha | E-PAPER | Pratibha

ODI WORLD CUP: అప్పుడు తండ్రి.. ఇప్పుడు తనయుడు

తండ్రి క్రికెటర్‌ అయితే.. తనయడూ ఇదే మార్గంలో ఉండటం ఆశ్చర్యం కాదు కానీ.. వరల్డ్‌ కప్‌ వంటి మెగా టోర్నీలో అప్పుడు తండ్రి, ఇప్పుడు కొడుకు ఆడటం మాత్రం ప్రత్యేకమైందే. ఇలాంటి ఘనతను నెదర్లాండ్స్‌కు చెందిన ఆటగాళ్లు సొంతం చేసుకున్నారు.

Published : 07 Oct 2023 16:15 IST

ప్రపంచకప్‌లో బాస్‌ డి లీడ్‌ మెరుపులు

1996 వన్డే ప్రపంచకప్‌ నాటి మాట. ఉపఖండంలో జరిగిన ఈ మెగా టోర్నీలో పాల్గొనడానికి తొలిసారి భారత్‌కు వచ్చింది నెదర్లాండ్స్‌ జట్టు. ఆడిన అయిదు మ్యాచ్‌ల్లోనూ చిత్తుగా ఓడిపోయింది. కానీ పెద్ద జట్లతో ఆడిన అనుభవాన్ని మాత్రం సంపాదించింది. ఈ జట్టులో ఉన్న టిమ్‌ డి లీడ్‌కు ఈ టోర్నీ ఓ మధుర స్మృతిగా మిగిలిపోయింది.

27 ఏళ్లు గడిపోయాయి. మళ్లీ భారత్‌లో ప్రపంచకప్‌ వచ్చింది. సుదీర్ఘ విరామం తర్వాత నెదర్లాండ్స్‌ భారత్‌లో అడుగుపెట్టింది. ఈసారి మరో డి లీడ్‌ వచ్చి పాకిస్థాన్‌తో తొలి మ్యాచ్‌లోనే సత్తా చాటాడు. అతడెవరో కాదు 1996 ప్రపంచకప్‌లో డచ్‌ జట్టుకు ప్రాతినిథ్యం వహించిన టిమ్‌ డి లీడ్‌ తనయుడు బాస్‌ డి లీడ్‌. హైదరాబాద్‌లో పాక్‌తో మ్యాచ్‌లో బౌలింగ్‌లో రాణించిన ఈ కుర్రాడు.. బ్యాటింగ్‌లోనూ టాప్‌ స్కోరర్‌గా నిలిచాడు. జట్టు విజయం కోసం తుద వరకు పోరాడాడు. తండ్రి బాటలో నడిచిన తనయుడిగా నిలిచాడు.

భారత్‌పై అదరగొట్టి..

1996 ప్రపంచకప్‌తోనే టిమ్‌ డి లీడ్‌ ఆగిపోలేదు. 2003, 2007 ప్రపంచకప్పుల్లోనూ నెదర్లాండ్స్‌కు ప్రాతినిథ్యం వహించాడు. ముఖ్యంగా దక్షిణాఫ్రికాలో జరిగిన 2003 ప్రపంచకప్‌లో అతడు తన ముద్ర వేశాడు. భారత్‌తో జరిగిన పోరులో టిమ్‌ డి లీడ్‌ 35 పరుగులకే 4 వికెట్లు తీసి సత్తా చాటాడు. అంతేకాదు సచిన్‌ తెందుల్కర్, ద్రవిడ్‌ వికెట్లు పడగొట్టి ఈ మ్యాచ్‌ను చిరస్మరణీయం చేసుకున్నాడు. బలమైన భారత్‌ 204 పరుగులకే పరిమితమైందంటే టిమ్‌ డి లీడే కారణం. ఆ మ్యాచ్‌లో భారత్‌ ఎలాగోలా గట్టెక్కినా టిమ్‌కే ‘మ్యాన్‌ ఆఫ్‌ ద మ్యాచ్‌’ అవార్డు లభించింది. ప్రస్తుతం టిమ్‌ డి లీడ్‌ కోచింగ్‌ ఇస్తున్నాడు. క్రీడా పరికరాల షాప్‌ నడుపుతున్నాడు.

తొలి మ్యాచ్‌లోనే..

ఇన్నేళ్లకు మళ్లీ అతడి తనయుడి రూపంలో ఆ ఇంట్లో నుంచి మరో ఆటగాడు ప్రపంచకప్‌ ఆడాడు. పాక్‌తో మ్యాచ్‌లో కప్‌ అరంగేట్రంలోనే బాస్‌ డి లీడ్‌ అదరగొట్టాడు. అప్పుడు తండ్రి మాదిరిగానే తాను కూడా 4 వికెట్లు పడగొట్టాడు. ఇంకో విశేషం ఏమిటంటే బ్యాటింగ్‌లోనూ రాణించి అర్ధసెంచరీ చేశాడు. ప్రపంచకప్‌ ఆరంభానికి ముందు నుంచే బాస్‌ డి లీడ్‌ మంచి ఫామ్‌లో ఉన్నాడు. కప్‌ క్వాలిఫయర్స్‌లో స్కాట్లాండ్‌పై 92 బంతుల్లోనే 123 పరుగులు చేయడమే కాదు 52 పరుగులకే 5 వికెట్లు పడగొట్టి ఒంటిచేత్తో డచ్‌ జట్టుకు విజయాన్ని అందించాడు. రాబోయే ప్రపంచకప్‌ మ్యాచ్‌ల్లోనూ అతడు కీలకంగా మారే అవకాశాలు ఉన్నాయి.

చరిత్రలో ఏడోసారి

ప్రపంచకప్‌లో తండ్రి, తనయుడు ఒక జట్టుకు ప్రాతినిధ్యం వహించడం చాలా అరుదు. అందుకే ఇన్నేళ్ల కప్‌ చరిత్రలో కేవలం ఏడు సందర్భాల్లోనే ఈ ఘటన చోటు చేసుకుంది. డాన్‌-డెరిక్‌ ప్రింగిల్, లాన్స్, క్రిస్‌ కెయిన్స్, క్రిస్, స్టువర్ట్‌ బ్రాడ్, జెఫ్‌ మార్ష్, షాన్‌ మార్ష్, మిచెల్‌ మార్ష్, రాడ్, టామ్‌ లేథమ్, కెవిన్, సామ్‌ కరన్‌.. ఇప్పుడు ఈ జాబితాలో టిమ్‌ డి లీడ్‌-బాస్‌ డి లీడ్‌ కూడా చేరారు.

-ఈనాడు క్రీడా విభాగం

► Read latest Sports News and Telugu News

► Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.