Hardik Pandya: లఖ్‌నవూకు వెళ్లాలనుకున్నా.. ఆ ఫోన్‌ కాల్‌తో మనసు మారింది

అహ్మదాబాద్‌: కెప్టెన్‌గా సత్తా చాటుకున్న ఆల్‌రౌండర్‌ హార్దిక్‌ పాండ్య నిరుడు గుజరాత్‌ టైటాన్స్‌ను ఐపీఎల్‌ అరంగేట్రంలోనే విజేతగా నిలిపిన సంగతి తెలిసిందే. ఈ ఆల్‌రౌండర్‌ తాజాగా ఓ ఆసక్తికర విషయం వెల్లడించాడు. కేఎల్‌ రాహుల్‌తో సాన్నిహిత్యం వల్ల మొదట తాను లఖ్‌నవూ సూపర్‌జెయింట్స్‌ జట్టులో చేరాలనుకున్నానని చెప్పాడు. ‘‘లఖ్‌నవూ ఫ్రాంఛైజీ నుంచి కూడా నాకు ఫోన్‌ వచ్చింది. నాకు బాగా తెలిసిన రాహుల్‌ ఆ జట్టుకు నాయకత్వం వహిస్తున్నాడు. అప్పుడు నేనున్న పరిస్థితుల్లో నా గురించి తెలిసిన వ్యక్తితో కలిసి ఆడాలనుకున్నా. నా గురించి తెలిసిన వారికి.. నా గురించి తెలియని వ్యక్తులకు భిన్నమైన అభిప్రాయం నాపై ఉంటుంది. ఈ నేపథ్యంలో లఖ్‌నవూ నుంచి అవకాశం రావడంతో ఆ ఫ్రాంఛైజీలో చేరాలనుకున్నా’’ అని హార్దిక్‌ చెప్పాడు. అయితే ఆశిష్‌ నెహ్రా నుంచి ఫోన్‌ రావడంతో తన మనసు మారిందని అతడు వెల్లడించాడు. ‘‘కానీ అశూ పా (నెహ్రా) నాకు ఫోన్‌ చేశాడు. అప్పటికి ఆ జట్టు (గుజరాత్‌)కు ఐపీఎల్‌లో భాగం కావడానికి అనుమతి రాలేదు. స్పష్టత లేదు. ‘నేను టైటాన్స్‌ కోచ్‌ కాబోతున్నా. ఇంకా నిర్ణయం కాలేదు. కానీ నేను కోచ్‌ అవుతా’ అని చెప్పాడు. అప్పుడు నేను ‘అశూ పా మీరు లేకపోతే నేను ఆ జట్టులో చేరడానికి అంగీకరించేవాణ్ని కాదు. ఎందుకంటే బాగా అర్థం చేసుకున్న వ్యక్తి మీరు’ అని అన్నా. ఫోన్‌ పెట్టేశాక.. ఫ్రాంఛైజీ కెప్టెన్‌గా నువ్వే ఉండాలనుకుంటున్నా అంటూ సందేశం పంపాడు. నేను ఆశ్చర్యపోయా’’ అని హార్దిక్‌ వివరించాడు.