David Warner: టోపీలు దొరికాయి.. భారం తొలగింది

సిడ్నీ: వార్నర్‌ టోపీలు దొరికాయి. రెండు బ్యాగీ గ్రీన్‌ టోపీలున్న ఓ బ్యాగు ఇప్పుడు ఆస్ట్రేలియా జట్టు ఉంటున్న హోటల్లోనే కనిపించింది. దీన్ని తీసుకున్న వార్నర్‌.. తన టోపీలు దొరికిన ఆనందాన్ని శుక్రవారం ఇన్‌స్టాగ్రామ్‌లో పంచుకున్నాడు. ‘‘నా బ్యాగీ గ్రీన్‌ టోపీలు దొరికాయని మీకు చెప్పేందుకు చాలా సంతోషంగా, అలాగే ఉపశమనంగానూ ఉంది. ఆ టోపీ ఎంత ప్రత్యేకమో ప్రతి క్రికెటర్‌కూ తెలుసు. ఈ సందర్భాన్ని జీవితాంతం గుర్తుంచుకుంటా. ఇవి నా వరకూ చేరడానికి సాయపడ్డ అందరికీ రుణపడి ఉంటా. గత రెండు రోజులుగా భుజాలపై ఉన్న భారం తొలగినట్లు అనిపిస్తోంది. రవాణా సంస్థ క్వాంటస్‌కు, హోటల్‌కు, టీమ్‌ మేనేజ్‌మెంట్‌కు ధన్యవాదాలు’’ అని పోస్టు చేసిన వీడియోలో వార్నర్‌ తెలిపాడు. వార్నర్‌ కెరీర్‌లో చివరి టెస్టు ఆడుతున్న సంగతి తెలిసిందే.