Sunrisers Hyderabad: సన్‌రైజర్స్‌ కెప్టెన్‌గా కమిన్స్‌?

దిల్లీ: ఈ ఏడాది ఐపీఎల్‌లో సన్‌రైజర్స్‌ హైదరాబాద్‌ కెప్టెన్‌ మారబోతున్నాడా? అంటే అవుననే సమాధానాలే వినిపిస్తున్నాయి. మార్‌క్రమ్‌ స్థానంలో కమిన్స్‌కు సారథ్య బాధ్యతలు అప్పజెప్పేందుకు సన్‌రైజర్స్‌ యాజమాన్యం ఆసక్తితో ఉన్నట్లు సమాచారం. నిరుడు ఐపీఎల్‌ వేలంలో కమిన్స్‌ కోసం సన్‌రైజర్స్‌ ఏకంగా రూ.20.5 కోట్లు చెల్లించిన సంగతి తెలిసిందే. ఐపీఎల్‌ చరిత్రలో ఇది రెండో అత్యధిక ధర. జట్టుకు కెప్టెన్‌గా నియమించడం కోసమే కమిన్స్‌కు జట్టు భారీ మొత్తం చెల్లించిందని తెలిసింది. గత సీజన్‌లో మార్‌క్రమ్‌ నాయకత్వంలోని సన్‌రైజర్స్‌ 14 మ్యాచ్‌ల్లో కేవలం నాలుగు విజయాలతో పట్టికలో చివరి స్థానంలో నిలిచింది. ఈ నేపథ్యంలో ప్రధాన కోచ్‌ బ్రయాన్‌ లారా స్థానాన్ని డేనియల్‌ వెటోరితో భర్తీ చేసిన విషయం విదితమే. మరోవైపు ఆస్ట్రేలియా జట్టు సహాయక కోచ్‌గా వెటోరి ఉన్నాడు. కమిన్స్‌ సారథ్యంలో కంగారూ జట్టు నిరుడు ప్రపంచ టెస్టు ఛాంపియన్‌గా నిలవడంతో పాటు వన్డే ప్రపంచకప్‌నూ సొంతం చేసుకుంది. ఈ క్రమంలో వెటోరి, కమిన్స్‌ కలిసి సన్‌రైజర్స్‌ కోసం పనిచేయబోతున్నారని సమాచారం. ఇక సన్‌రైజర్స్‌కు చెందిన సన్‌రైజర్స్‌ ఈస్టర్న్‌ కేప్‌ జట్టును వరుసగా రెండో సారి దక్షిణాఫ్రికా టీ20 లీగ్‌లో సారథిగా మార్‌క్రమ్‌ విజేతగా నిలిపాడు. అయినప్పటికీ ఐపీఎల్‌లో మాత్రం సన్‌రైజర్స్‌ కెప్టెన్‌గా అతనిపై వేటు పడటం ఖాయమేనని తెలిసింది. మరోవైపు ఆ జట్టు బౌలింగ్‌ కోచ్‌ డేల్‌ స్టెయిన్‌ ఈ ఏడాది ఐపీఎల్‌కు దూరంగా ఉండనున్నట్లు సమాచారం. బాధ్యతల నుంచి విరామం కోరుకుంటున్న అతను.. 2025 ఐపీఎల్‌ కోసం తిరిగి జట్టుతో చేరే అవకాశముంది. స్టెయిన్‌ స్థానంలో న్యూజిలాండ్‌ మాజీ పేసర్‌ జేమ్స్‌ ఫ్రాంక్లిన్‌ సన్‌రైజర్స్‌ జట్టుతో చేరనున్నాడు.