నీరజ్‌.. దోహా టోర్నీతో షూరూ

దిల్లీ: ఒలింపిక్‌ ఛాంపియన్‌ నీరజ్‌ చోప్రా ఈ సీజన్‌ను మే 10న ఆరంభమయ్యే డైమండ్‌ లీగ్‌ దోహా అంచె టోర్నీతో షురూ చేయనున్నాడు. ఆసియా క్రీడల్లో పసిడి గెలిచి గత సీజన్‌ను ఘనంగా ముగించిన 26 ఏళ్ల నీరజ్‌.. ఈ ఏడాది తొలి టోర్నీలోనూ శుభారంభం చేయాలని భావిస్తున్నాడు. ‘‘ఈ ఏడాది నా లక్ష్యం ఒలింపిక్‌ స్వర్ణాన్ని నిలబెట్టుకోవడం. 90 మీటర్లు దాటడం ఇంకో లక్ష్యం. ఈ సీజన్‌ను మెరుగ్గా ఆరంభించడానికి దోహాకు మించిన వేదిక దొరకబోదు’’ అని నీరజ్‌ చెప్పాడు. ఒలింపిక్‌ రజత పతక విజేత జాకబ్‌ వాద్లెచ్‌ (చెక్‌ రిపబ్లిక్‌), మాజీ ప్రపంచ ఛాంపియన్‌ అండర్సన్‌ పీటర్స్‌ (గ్రెనెడా) నుంచి నీరజ్‌కు గట్టిపోటీ ఎదురుకానుంది. మరోవైపు 2023 ప్రపంచ ఛాంపియన్‌షిప్‌లో అయిదో స్థానంలో నిలిచి.. ఆసియా క్రీడల్లో రజతం గెలిచిన మరో భారత ఆటగాడు కిశోర్‌ జెనా కూడా దోహా ఈవెంట్లో బరిలో దిగుతున్నాడు.