ఆకాశ్‌, అనిరుధ్‌ ఓటమి

బిష్కెక్‌: ఆసియా రెజ్లింగ్‌ ఛాంపియన్‌షిప్‌లో ఆకాశ్‌ దహియా, అనిరుధ్‌ కుమార్‌లకు నిరాశ ఎదురైంది. ఈ భారత కుర్రాళ్లు కాంస్య పతక పోరులో ఓడారు. 61 కేజీల్లో ఎంక్‌బోల్డ్‌ ఎంక్‌బాత్‌ (మంగోలియా) చేతిలో ఆకాశ్‌ చిత్తు కాగా.. 125 కేజీల్లో షమిల్‌ షరిపోవ్‌ (బహ్రెయిన్‌) అనిరుధ్‌ను కంగుతినిపించాడు. మరో భారత రెజ్లర్‌ యశ్‌ తుషీర్‌ (74 కేజీ) రెపిచేజ్‌లో పరాజయం చవిచూశాడు. సైబాజ్‌ (కజకిస్థాన్‌) అతడిపై పైచేయి సాధించాడు. సందీప్‌సింగ్‌ మాన్‌ (86 కేజీ), వినయ్‌ (92 కేజీ) క్వాలిఫికేషన్లోనే ఇంటిముఖం పట్టారు. ఈ టోర్నీలో భారత్‌ పురుషుల విభాగంలో మూడు పతకాలు నెగ్గింది. ఫ్రీస్టైల్‌ ఈవెంట్లో ఉదిత్‌ (57 కేజీ) రజతం గెలవగా.. విక్కీ (97 కేజీ), అభిమన్యు (70 కేజీ) కాంస్యాలు సొంతం చేసుకున్నారు. శనివారం మహిళల బౌట్లు ప్రారంభం కానున్నాయి.