ధీరజ్‌ బృందానికి స్వర్ణం

కొరియాకు షాకిచ్చిన భారత జట్టు

షాంఘై: ఆర్చరీ ప్రపంచకప్‌ను భారత క్రీడాకారులు మరో అద్భుత ప్రదర్శనతో ముగించారు. తెలుగబ్బాయి ధీరజ్‌ బొమ్మదేవర, తరుణ్‌దీప్‌రాయ్‌, ప్రవీణ్‌ జాదవ్‌తో కూడిన భారత జట్టు పురుషుల రికర్వ్‌ టీమ్‌ స్వర్ణ పతకాన్ని గెలుచుకుంది. ఆదివారం ఫైనల్లో భారత త్రయం 5-1తో ఒలింపిక్‌ ఛాంపియన్‌ దక్షిణ కొరియా జట్టుకు షాకిచ్చింది. 14 ఏళ్ల తర్వాత ప్రపంచకప్‌లో భారత్‌కు పురుషుల రికర్వ్‌ టీమ్‌ ఈవెంట్లో పసిడి దక్కింది. ఈ విజయంతో ఒలింపిక్‌ బెర్తు సాధించే అవకాశాలను కూడా భారత్‌ మెరుగుపర్చుకుంది. ధీరజ్‌ మరో పతకం కూడా గెలుచుకున్నాడు. అంకితతో కలిసి మిక్స్‌డ్‌ టీమ్‌ ఈవెంట్లో అతడు కాంస్యం సాధించాడు. ఈ జంట 6-0తో వాలెన్సియా- మతియాస్‌ గ్రాండె (మెక్సికో) జంటపై గెలిచింది. మహిళల వ్యక్తిగత రికర్వ్‌లో దీపిక కుమారి రజతంతో సరిపెట్టుకుంది. ఫైనల్లో ఆమె 0-6తో ఆసియా క్రీడల ఛాంపియన్‌ లిమ్‌ సియోన్‌ చేతిలో పరాజయంపాలైంది. మొత్తంగా భారత్‌ అయిదు స్వర్ణాలు సహా ఎనిమిది పతకాలతో ప్రపంచకప్‌ను ముగించింది. తెలుగమ్మాయి జ్యోతిసురేఖ వ్యక్తిగత స్వర్ణంతో పాటు మిక్స్‌డ్‌, టీమ్‌ విభాగాల్లో పసిడి పతకాలు నెగ్గిన సంగతి తెలిసిందే.