అమెరికా అదరహో..

బంగ్లాదేశ్‌పై టీ20 సిరీస్‌ కైవసం 

హూస్టన్‌: అమెరికా సంచలనం సృష్టించింది. బంగ్లాదేశ్‌కు వరుసగా రెండో టీ20లోనూ షాకిచ్చి చరిత్రాత్మక సిరీస్‌ విజయం సాధించింది. రెండో టీ20లో ఆరు పరుగుల తేడాతో గెలిచిన అమెరికా.. మూడు మ్యాచ్‌ల సిరీస్‌లో 2-0 ఆధిక్యం సంపాదించింది. మొనాంక్‌ పటేల్‌ (42), ఆరన్‌ జోన్స్‌ (35), స్టీవెన్‌ టేలర్‌ (31) రాణించడంతో మొదట అమెరికా 6 వికెట్లకు 144 పరుగులు చేసింది. అలీ ఖాన్‌ (3/25), సౌరభ్‌ నేత్రావల్కర్‌ (2/15), షాల్‌క్విక్‌ (2/21) ధాటికి ఛేదనలో బంగ్లాదేశ్‌ 19.3 ఓవర్లలో 138 పరుగులకే ఆలౌటైంది. నజ్ముల్‌ శాంటో (36) టాప్‌ స్కోరర్‌. ఈ సిరీస్‌ రెండు జట్లకు టీ20 ప్రపంచకప్‌కు సన్నాహకంగా పనిచేస్తుంది. పసికూన అమెరికా చేతిలో ఈ ఓటములు బంగ్లాకు అవమానమే. తొలి టీ20లో అమెరికా  5 వికెట్ల తేడాతో గెలిచింది. ఓ టాప్‌-10 టీ20 జట్టుపై నెగ్గడం యుఎస్‌ఏకు అదే తొలిసారి.