పరిస్థితులు మారాయి.. ఎన్‌ఓసీ వచ్చింది

దిల్లీ: ఆంధ్రప్రదేశ్‌ రాష్ట్రంలో పరిస్థితులు మారడంతో తనకు నిరభ్యంతర పత్రం (ఎన్‌ఓసీ) లభించిందని భారత టెస్టు క్రికెటర్‌ గాదె హనుమ విహారి అన్నాడు. రెండు నెలలుగా ఎన్‌ఓసీ అడుగుతున్నా ఆంధ్ర క్రికెట్‌ సంఘం (ఏసీఏ) పట్టించుకోలేదని తెలిపాడు. ఆంధ్ర రంజీ జట్టు సారథ్యం నుంచి తనను అర్ధంతరంగా తప్పించడంపై అసంతృప్తి వ్యక్తంజేసిన విహారి.. ఆంధ్రకు మళ్లీ ఆడబోనంటూ ప్రకటించాడు. దీనిపై ఈ ఏడాది మార్చిలో విహారికి ఏసీఏ షోకాజ్‌ నోటీసు ఇచ్చింది. మరోవైపు దేశవాళీ సీజన్‌లో మరో రాష్ట్రం తరఫున ఆడేందుకు ఎన్‌ఓసీ ఇవ్వాలంటూ ఏసీఏకు విహారి పలుమార్లు విజ్ఞప్తి చేసినా ఫలితం లేకపోయింది. ‘‘రెండు నెలలుగా ఎన్‌ఓసీ కోసం అడుగుతున్నా. నాలుగు సార్లు ఈమెయిల్‌ చేశా. అయినా ఎన్‌ఓసీ ఇవ్వలేదు. ఇప్పుడు పరిస్థితులు మారాయి. వెంటనే ఎన్‌ఓసీ ఇచ్చారు’’ అంటూ మంగళవారం ‘ఎక్స్‌’లో విహారి పేర్కొన్నాడు.