ఇంగ్లాండ్‌పై కివీస్‌ క్లీన్‌స్వీప్‌

వెల్లింగ్టన్‌: ఇంగ్లాండ్‌తో మూడు వన్డేల సిరీస్‌ను న్యూజిలాండ్‌ క్లీన్‌స్వీప్‌ చేసింది. శనివారం మూడో వన్డేలో ఆ జట్టు 2 వికెట్ల తేడాతో నెగ్గింది. మొదట ఇంగ్లాండ్‌ 40.2 ఓవర్లలో 222 పరుగులకే ఆలౌటైంది. ఒక దశలో ఇంగ్లిష్‌ జట్టు 102 పరుగులకే 7 వికెట్లు కోల్పోయింది. జేమీ ఒవర్టన్‌ (68), బట్లర్‌ (38), బ్రైడన్‌ కార్స్‌ (36) పోరాటంతో స్కోరు 200 దాటింది. టిక్నర్‌ (4/64), జాకబ్‌ డఫీ (3/56), ఫౌల్క్స్‌ (2/27) ప్రత్యర్థిని కట్టడి చేశారు. ఛేదనలో రచిన్‌ రవీంద్ర (46), కాన్వే (34) తొలి వికెట్‌కు 78 పరుగులు జత చేసి న్యూజిలాండ్‌కు శుభారంభం అందించారు. వాళ్లిద్దరూ స్వల్ప వ్యవధిలో ఔటయ్యాక.. కివీస్‌ ఇన్నింగ్స్‌ 147/5తో తడబడింది. ఈ స్థితిలో శాంట్నర్‌ (27) జతగా డరిల్‌ మిచెల్‌ (44) జట్టును ఆదుకున్నాడు. వీళ్లిద్దరూ వెనుదిరిగినా..టిక్నర్‌ (18 నాటౌట్‌), ఫౌల్క్స్‌ (14 నాటౌట్‌) పని పూర్తి చేశారు. న్యూజిలాండ్‌ 44.4 ఓవర్లలో 8 వికెట్లు కోల్పోయి లక్ష్యాన్ని అందుకుంది.