లక్ష్యం 275.. భారత్‌-ఎ 119/4

బెంగళూరు: దక్షిణాఫ్రికా-ఎతో నాలుగు రోజుల మ్యాచ్‌లో భారత్‌-ఎ ముందు 275 పరుగుల లక్ష్యం నిలిచింది. ఛేదనలో మూడో రోజు, శనివారం ఆట చివరికి భారత్‌ 4 వికెట్లకు 119 పరుగులు చేసింది. కెప్టెన్‌ రిషబ్‌ పంత్‌ (64 బ్యాటింగ్‌) సత్తా చాటాడు. గెలవాలంటే ఇంకో 156 పరుగులు చేయాలి. 32 పరుగులకే 3 వికెట్లు పడినా.. రజత్‌ పాటీదార్‌ (28) తోడుగా పంత్‌ ఇన్నింగ్స్‌ను నడిపించాడు. పాటీదార్‌ ఆట చివర్లో ఔటయ్యాడు. పంత్‌కు తోడు ఆయుష్‌ బదోని (0) క్రీజులో ఉన్నాడు. అంతకుముందు దక్షిణాఫ్రికా 199 పరుగులకే ఆలౌటైంది. తనుష్‌ (4/36), కాంబోజ్‌ (3/39), గుర్నూర్‌ బ్రార్‌ (2/40) ప్రత్యర్థికి కళ్లెం వేశారు. తొలి ఇన్నింగ్స్‌లో దక్షిణాఫ్రికా 309.. భారత్‌ 234 పరుగులు చేశాయి.