IND vs PAK: అది పోరాటం కాదు.. చరిత్ర అవుతుంది: పాక్‌తో మ్యాచ్‌పై హార్దిక్‌

ఇంటర్నెట్ డెస్క్‌: మరో రెండు రోజుల్లో టీ20 ప్రపంచ కప్‌ వేదికగా పాకిస్థాన్‌తో భారత్‌ (IND vs PAK) తలపడనుంది. ఐర్లాండ్‌ను ఓడించిన టీమ్‌ఇండియా సమరోత్సాహంతో ఉండగా.. యూఎస్‌ఏ చేతిలో అనూహ్య పరాజయం పాలైన పాక్‌ ఒత్తిడిలో ఉంది. అయితే, దాయాదుల పోరంటే ప్రేక్షకులకే కాదు.. ఇరు జట్ల ప్లేయర్లకూ టెన్షనే. ఇలాంటి గొప్ప మ్యాచుల్లో ఆడటం ఎప్పటికీ స్పెషలేనని భారత స్టార్‌ ఆల్‌రౌండర్ హార్దిక్‌ పాండ్య (Hardik Pandya) వ్యాఖ్యానించాడు. పాక్‌తో ఆడేందుకు ఆత్రుతగా ఎదురుచూస్తున్నట్లు తెలిపాడు.

‘‘పాకిస్థాన్‌తో జరగబోయే మ్యాచ్‌ను ఎప్పుడూ ‘ఫైట్‌’గా భావించను. ఇలాంటి జట్టుతో ఆడేటప్పుడు ఒత్తిడి ఉండటం సహజమే. పాక్‌తో మాత్రం నాకు మరింత స్పెషల్‌గా అనిపిస్తుంది. ప్రపంచమంతా ఉత్కంఠగా ఎదురుచూస్తుంది. ప్రతి ఒక్కరూ ఊపిరి బిగపట్టి ఉంచుకోవాలనేది నా అభ్యర్థన. ఈ మ్యాచ్‌ పోరాటం కాదు.. ఇది చరిత్ర అవుతుంది. దాయాదుల పోరు భావోద్వేగంతో కూడి ఉంటుంది. ఆనందం, ఆందోళన, బాధ.. ఇలా అన్నింటినీ అనుభవిస్తారు. తప్పకుండా మనం విజయం సాధిస్తామనే నమ్మకం ఉంది. జట్టుగా ఆడి ప్రత్యర్థిపై విరుచుకుపడటమే మా ముందున్న లక్ష్యం. ప్రణాళికలు అనుకున్నట్లుగా సాగితే అంతకంటే గొప్ప రోజు మరొకటి ఉండదు’’ అని హార్దిక్‌ వెల్లడించాడు.

పాకిస్థాన్‌తో ఇప్పటివరకు హార్దిక్‌ పాండ్య ఆరు మ్యాచుల్లో తలపడ్డాడు. మొత్తం 84 పరుగులు రాబట్టాడు. గత పొట్టి కప్‌లో 40 పరుగులు చేసి జట్టు విజయంలో కీలక పాత్ర పోషించాడు. పేస్‌ ఆల్‌రౌండర్ హార్దిక్ ఆరు మ్యాచుల్లో 11 వికెట్లు పడగొట్టాడు. పాక్‌పై అతడికి మంచి ఎకానమీ ఉంది. కేవలం 7.5 ఎకానమీతో పరుగులు ఇచ్చాడు. అత్యుత్తమ గణాంకాలు 3/8.