IND vs AUS:: బోర్డర్‌- గావస్కర్‌ ట్రోఫీ షెడ్యూల్ విడుదల.. అడిలైడ్‌లో పింక్ బాల్ టెస్టు

భారత్‌, ఆస్ట్రేలియా మధ్య జరిగే ప్రతిష్టాత్మక బోర్డర్‌- గావస్కర్‌ ట్రోఫీ షెడ్యూల్‌ విడుదలైంది. 

Published : 26 Mar 2024 19:10 IST

దిల్లీ: భారత్‌, ఆస్ట్రేలియా మధ్య జరిగే ప్రతిష్టాత్మక బోర్డర్‌- గావస్కర్‌ ట్రోఫీ (Border-Gavaskar Trophy) ఇకమీదట అయిదు మ్యాచ్‌ల టెస్టు సిరీస్‌గా జరగనుంది. ఇప్పటి వరకూ 4 మ్యాచ్‌ల సిరీస్‌గా కొనసాగిన ఈ ట్రోఫీకి మరో టెస్టును చేర్చినట్లు సోమవారం క్రికెట్‌ ఆస్ట్రేలియా (సీఏ) ప్రకటించింది. 2024-25 మధ్య జరిగే ఈ సిరీస్‌ షెడ్యూల్‌ మంగళవారం విడుదలైంది. తొలి టెస్టు ఈ ఏడాది నవంబర్‌ 22న పెర్త్ వేదికగా మొదలవుతుంది. రెండో టెస్టు (పింక్ బాల్ టెస్టు) డే/నైట్‌ జరగనుంది. దీనికి అడిలైడ్‌ ఓవల్‌ మైదానం ఆతిథ్యం ఇవ్వనుంది. మూడో టెస్టు బ్రిస్బేన్‌, నాలుగో టెస్టు మెల్‌బోర్న్‌, ఐదో టెస్టుకు సిడ్నీ వేదిక కానుంది. 1991-92 తర్వాత భారత్‌, ఆసీస్‌ అయిదు మ్యాచ్‌ల టెస్టు సిరీస్‌లో తలపడటం ఇదే తొలిసారి. ఈ ఏడాది డిసెంబరులో భారత మహిళల క్రికెట్ జట్టు ఆస్ట్రేలియాలో పర్యటించనుంది. ఆసీస్‌తో మూడు వన్డేలు ఆడనుంది. ఇందుకు సంబంధించిన షెడ్యూల్‌ కూడా విడుదలైంది. తొలి రెండు వన్డేలు డిసెంబరు 5, 8న బ్రిస్బేన్‌లో, మూడో వన్డే డిసెంబరు 8న పెర్త్‌లో జరుగనుంది. 

ఇక, బోర్డర్‌- గావస్కర్‌ ట్రోఫీలో గత నాలుగు సిరీస్‌ల్లో టీమ్‌ఇండియా (Team India)నే వరుసగా విజేతగా నిలిచింది. ఇందులో రెండు సిరీస్‌ల్లో ఆసీస్‌ను వారి సొంత గడ్డపైనే ఓడించడం విశేషం. అయితే.. గత ఏడాది లండన్‌లో జరిగిన WTC ఫైనల్‌లో మాత్రం భారత్‌ను ఆస్ట్రేలియా ఓడించి గదను ఎగరేసుకుపోయింది.

2024-25 బోర్డర్‌- గావస్కర్‌ ట్రోఫీ షెడ్యూల్ 

  • తొలి టెస్టు: నవంబర్‌ 22-26, పెర్త్
  • రెండో టెస్టు: డిసెంబరు 6-10, అడిలైడ్ (డే/నైట్‌)
  • మూడో టెస్టు: డిసెంబరు 14-18, బ్రిస్బేన్‌ 
  • నాలుగో టెస్టు: డిసెంబరు 26-30, మెల్‌బోర్న్‌ 
  • అయిదో టెస్టు: జనవరి 3-7, సిడ్నీ
Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని