Asia Cup 2023: పాక్‌లో ఆసియాకప్‌ ఆడబోం..: జైషా

ఇంటర్నెట్‌డెస్క్‌:  పాకిస్థాన్‌లో వచ్చే ఏడాది జరగనున్న ఆసియాకప్‌-2023లో భారత్‌ జట్టు పాల్గొనబోదని బీసీసీఐ కార్యదర్శి జైషా ప్రకటించారు. ముంబయిలో మంగళవారం జరిగిన బీసీసీఐ 91వ వార్షిక సమావేశం అనంతరం ఆయన ఈ విషయాన్ని వెల్లడించారు. వచ్చే ఏడాది ఆసియాకప్‌ పాకిస్థాన్‌లో కాకుండా తటస్థవేదికపై ఆడవచ్చని పేర్కొన్నారు. ప్రస్తుతం ఆసియా క్రికెట్‌ కౌన్సిల్‌ చీఫ్‌గా కూడా షా వ్యవహరిస్తున్నారు. దీంతో పాక్‌లో ఈ టోర్నీ జరగడంపై కూడా సందేహాలు ముసురుకొన్నాయి. ఈ అంశంపై ఆసియా క్రికెట్‌ కౌన్సిల్‌లో చర్చించాల్సి ఉంది. ముంబయిలో ఏజీఎం అనంతరం జైషా మాట్లాడుతూ.. ‘‘ఆసియా కప్‌ తటస్థ వేదికపై జరుగుతుంది. నేను ఏసీసీ అధ్యక్షుడిగా ఈ మాట చెబుతున్నా. మేము అక్కడికి వెళ్లము. వారు ఇక్కడికి రారు. గతంలో కూడా ఆసియాకప్‌లు తటస్థ వేదికలపై నిర్వహించాం’’ అని వ్యాఖ్యానించారు. 

ఇక భారత్‌ చివరి సారిగా 2006లో పాక్‌లో పర్యటించింది. ఇరు దేశాల మధ్య ఉద్రిక్తతలు పెరగడంతో 2012-13 నుంచి భారత్‌-పాక్‌ ద్వైపాక్షిక సిరీస్‌లు ఆడలేదు. ప్రపంచ స్థాయి టోర్నీలు, ఆసియాకప్‌ల్లో మాత్రమే పరస్పరం తలపడుతున్నాయి. భారత్‌-పాక్‌లు చివరి సారిగా యూఏఈలో 2022 టీ20 ఆసియాకప్‌లో తలపడ్డాయి. ఈ నెల 23న టీ20 ప్రపంచ కప్‌లో కూడా మరోసారి దాయాదుల పోరు జరగనుంది. 

నేడు ముంబయిలో నిర్వహించిన వార్షిక సర్వసభ్య సమావేశంలో రోజర్‌ బిన్నీని బీసీసీఐ నూతన అధ్యక్షుడిగా ప్రకటించారు. బిన్నీ ఒక్కరే ఈ పదవికి నామినేషన్‌ దాఖలు చేయడంతో ఏకగ్రీవంగా ఎన్నికయ్యారు. జైషా కార్యదర్శిగా మరోసారి కొనసాగనున్నారు.