Mohammed Shami Sister: క్రికెటర్ షమీ సోదరి.. ‘ఉపాధి హామీ’ కూలీ!

ఇంటర్నెట్‌ డెస్క్‌: టీమ్‌ఇండియా సీనియర్‌ పేసర్‌ మహ్మద్‌ షమీ (Mohammed Shami)కి సంబంధించి జాతీయ మీడియాలో వచ్చిన వార్త చర్చనీయాంశంగా మారింది. ఈ స్టార్‌ క్రికెటర్‌ సోదరి (shami sister) పేరు ఉపాధి హామీ పథకం లబ్ధిదారుల జాబితాలో ఉండటమే అందుక్కారణం. ఉత్తరప్రదేశ్‌లోని అమ్రోహాలో జాతీయ ఉపాధి హామీ పథకం కింద షమీ సోదరి షబీమా, ఆమె భర్త కూలీ డబ్బులు తీసుకుంటున్నట్లు తెలుస్తోంది.

ఈ మేరకు విశ్వసనీయ వర్గాలను ఉటంకిస్తూ పలు ఆంగ్ల మీడియా కథనాలు వెల్లడించాయి. షబీనా, ఆమె భర్త ఉపాధి హామీ (MGNREGA) కార్మికులుగా పేర్లు నమోదు చేసుకున్నారని, 2021 నుంచి 2024 వరకు డబ్బులు తీసుకున్నారని సదరు కథనాలు పేర్కొన్నాయి. ఈ వార్తలపై షమీ గానీ, అతడి కుటుంబసభ్యుల నుంచి గానీ ఎలాంటి స్పందన రాలేదు. అయితే వాస్తవంగా వీరే తమ పేర్లు నమోదు చేసుకున్నారా లేక ఇతరులు ఇలా చేసి మోసాలకు పాల్పడుతున్నరా అన్నది తెలియరాలేదు. 

• అతడికి ఎందుకు అవకాశం ఇవ్వలేదు? ఫ్యాన్‌ డిబేట్‌లోకి సుందర్‌ పిచాయ్ ఎంట్రీ!

ఇటీవల ఛాంపియన్స్‌ ట్రోఫీ ఫైనల్‌ మ్యాచ్‌ సందర్భంగా షమీ తల్లి, సోదరి స్టేడియంలో కన్పించిన సంగతి తెలిసిందే. ఆ మ్యాచ్‌లో టీమ్‌ఇండియా గెలిచిన అనంతరం వీరు షమీతో కలిసి మైదానంలో ఫొటోలు దిగారు. ఇక, గాయం కారణంగా కొన్నాళ్ల పాటు దూరంగా ఉన్న ఈ సీనియర్‌ పేసర్‌ ఈ ఏడాది జనవరిలో టీమ్‌ఇండియాలో పునరాగమనం చేశాడు. ఛాంపియన్స్‌ ట్రోఫీలో తన ప్రదర్శనతో ఆకట్టుకున్నాడు.