Sourav Ganguly: బర్త్‌డే రోజున కీలక ప్రకటన.. ‘సౌరభ్‌ గంగూలీ మాస్టర్‌క్లాస్‌’

ఇంటర్నెట్‌ డెస్క్‌: టీమ్‌ఇండియా మాజీ కెప్టెన్ సౌరభ్‌ గంగూలీకి (Sourav Ganguly) పుట్టిన రోజు శుభాకాంక్షలు వెల్లువెత్తాయి. అయితే, తన 51వ పుట్టిన రోజు సందర్భంగా గంగూలీ (Ganguly Birthday) కీలక ప్రకటన చేశాడు. ‘సౌరభ్ గంగూలీ మాస్టర్‌క్లాస్‌’ పేరుతో యాప్‌ను అందుబాటులోకి తెచ్చి నాయకత్వ లక్షణాలపై ఆన్‌లైన్‌ కోర్సు ప్రవేశపెడుతున్నట్లు తెలిపాడు. ఈ మేరకు ట్వీట్ చేశాడు.

ఇదీ చదవండి: మన దేశంలో అత్యంత సంపన్న క్రికెటర్‌ ఎవరో తెలుసా?

‘‘దాదాపు 16 ఏళ్ల అంతర్జాతీయ క్రికెట్, పెద్ద సంఖ్యలో మ్యాచ్‌లు ఆడిన అనుభవంతో నా 51 పుట్టిన రోజు సందర్భంగా కీలక నిర్ణయం తీసుకున్నా. నేను నేర్చుకున్న అంశాలను మీ కోసం తీసుకొస్తున్నా. ‘సౌరభ్ గంగూలీ మాస్టర్‌క్లాస్’ అనే యాప్‌ ద్వారా మొదటిసారి నాయకత్వంపై ఆన్‌లైన్‌ కోర్సును అందుబాటులోకి తీసుకొస్తున్నట్లు ప్రకటిస్తున్నా. దీనికోసం కృషి చేసిన క్లాస్‌ప్లస్‌ (ఎడ్‌టెక్ స్టార్టప్‌)కు ధన్యవాదాలు. నేను, క్లాస్‌ప్లస్‌ కలిసి ఆన్‌లైన్‌ కోర్సును మీకు అందించడానికి వస్తున్నాం’’ అని తెలిపాడు. గంగూలీ తీసుకున్న నిర్ణయానికి మాజీ క్రికెటర్లు, బీసీసీఐ  ప్రధాన కార్యదర్శి జైషా అభినందిస్తూనే జన్మదిన శుభాకాంక్షలు చెప్పారు.

‘‘హ్యాపీ బర్త్‌డే దాదా. ఆయురారోగ్యాలతో ఇలాగే కొనసాగాలని ఆశిస్తున్నా. మీరు అనుకున్న లక్ష్యాలను ఈ ఏడాదిలో చేరుకుంటావని ఆకాంక్షిస్తున్నా’’ - జైషా

‘‘సౌరభ్‌ గంగూలీకి జన్మదిన శుభాకాంక్షలు. సంతోషం, సక్సెస్, మధురమైన జ్ఞాపకాలతో రోజంతా నిండిపోవాలి. యువతర ఆటగాళ్లకు స్ఫూర్తిగా నిలుస్తూ జాతీయ జట్టును అద్భుతంగా నడిపించి ముందుకు సాగావు. మైదానంలోనూ వెలుపలా నువ్వు నిజమైన లెజెండ్‌’’ - సురేశ్‌ రైనా

‘‘గొప్ప స్నేహితుడైన సౌరభ్‌ గంగూలీకి పుట్టిన రోజు శుభాకాంక్షలు. కెప్టెన్‌గా, సీనియర్ ఆటగాడిగా యువకులపై ప్రభావం చూపించిన దిగ్గజానివి. ప్రత్యేకమైన రోజు మరింత సంతోషకరంగా గడపాలని ఆశిస్తున్నా’’ - యువ్‌రాజ్‌ సింగ్‌

‘‘భారత క్రికెట్‌కు నువ్వు ధరించిన జెర్సీ, నువ్వాడిన కాలం ఎంతో ప్రత్యేకమైంది. టీమ్‌ఇండియాను ఉన్నత శిఖరాలకు చేర్చిన ఘనత సాధించిన కెప్టెన్‌గా చరిత్రలో నిలిచిపోతావు’’ - వసీమ్‌ జాఫర్