Satwik-Chirag: ఛాంప్స్‌ సాత్విక్‌-చిరాగ్‌

భారత జోడీకి థాయ్‌లాండ్‌ ఓపెన్‌ టైటిల్‌

బ్యాంకాక్‌: భారత అగ్రశ్రేణి బ్యాడ్మింటన్‌ జోడీ సాత్విక్‌ సాయిరాజ్, చిరాగ్‌ శెట్టి అదరగొట్టారు. థాయ్‌లాండ్‌ ఓపెన్‌ ప్రపంచ టూర్‌ సూపర్‌ 500 టోర్నీలో విజేతలుగా నిలిచారు. ఆదివారం జరిగిన పురుషుల డబుల్స్‌ ఫైనల్లో ఈ జంట 21-15, 21-15తో చెన్‌ యాంగ్‌- ల్యూ యి (చైనా) జంటపై విజయం సాధించింది. వరుస గేమ్‌లలో ప్రత్యర్థిని చిత్తుచేసిన భారత జోడీ పారిస్‌ ఒలింపిక్స్‌కు ముందు ఆత్మవిశ్వాసాన్ని మూటగట్టుకుంది. బీడబ్ల్యూఎఫ్‌ ప్రపంచ టూర్‌ టోర్నీల్లో సాత్విక్‌- చిరాగ్‌ జోడీకి ఇది తొమ్మిదో టైటిల్‌ కాగా.. 2024లో రెండోది. ఈ ఏడాది మార్చిలో సాత్విక్‌- చిరాగ్‌ జోడీ ఫ్రెంచ్‌ ఓపెన్‌ సూపర్‌ 750 టైటిల్‌ సాధించింది. మలేసియా సూపర్‌ 1000, ఇండియా సూపర్‌ 750 టోర్నీల్లో రన్నరప్‌గా నిలిచింది. థాయ్‌లాండ్‌ ఓపెన్‌ తుది పోరులో సాత్విక్‌- చిరాగ్‌ జోడీకి ఎదురులేకుండా పోయింది. 5-1తో మొదటి గేమ్‌ను ప్రారంభించిన సాత్విక్‌- చిరాగ్‌ జోడీ 14-11తో ముందంజ వేసింది. ప్రత్యర్థి జంట నుంచి కాస్త ప్రతిఘటన ఎదురవడంతో భారత ద్వయం ఆధిక్యం 16-14కు తగ్గింది. అయితే ఒక్కసారిగా గేరు మార్చిన సాత్విక్‌- చిరాగ్‌ జోడీ వరుస పాయింట్లతో హోరెత్తించి 21-15తో తొలి గేమ్‌ను ముగించింది. రెండో గేమ్‌ కూడా మొదటి గేమ్‌కు నకలులా సాగింది. సాత్విక్‌- చిరాగ్‌ ధ్వయం ఆరంభం నుంచి ఆధిపత్యం కొనసాగించింది. 15-11తో ఆధిక్యంలో నిలిచింది. ఆ సమయంలో పుంజుకున్న చైనా జంట 14-15, 15-16తో భారత జోడీని సమీపించింది. అయితే మరోసారి జూలు విదిల్చిన సాత్విక్‌- చిరాగ్‌ జోడీ ప్రత్యర్థి ఇంకో అవకాశం ఇవ్వకుండా 21-15తో రెండో గేమ్‌ను, మ్యాచ్‌ను సొంతం చేసుకుంది. 2019లో థాయ్‌లాండ్‌ ఓపెన్‌లో విజేతగా నిలిచిన భారత జోడీ మరోసారి టైటిల్‌ను దక్కించుకుంది.