Yashasvi Jaiswal: బాంద్రాలో ఇంటిని కొనుగోలు చేసిన యశస్వి జైస్వాల్‌.. ధర ఎంతంటే?

ఇంటర్నెట్ డెస్క్: టీమ్‌ఇండియా యువ సంచలనం యశస్వి జైస్వాల్‌ (Yashasvi Jaiswal) ఇప్పుడు ఏం చేసినా వైరల్‌ అయిపోతున్నాడు. ఇంగ్లాండ్‌పై టెస్టు సిరీస్‌లో రెండు డబుల్‌ సెంచరీలు చేసిన అతడు.. ఐసీసీ ర్యాంకుల్లోనూ జోరు చూపించాడు. టాప్‌ -20లోకి వచ్చేశాడు. తాజాగా మరో విషయం బయటకొచ్చింది. అతడు ఓ ఇంటిని కొనుగోలు చేసినట్లు వార్తలు వస్తున్నాయి. అదీనూ అత్యంత ఖరీదైన ముంబయి మహానగరంలోని బాంద్రా ప్రాంతంలో ఓ ఫ్లాట్‌ను కొనుగోలు చేసినట్లు సమాచారం. రిజిస్ట్రేషన్‌ డాక్యుమెంట్ల ప్రకారం.. ఈస్ట్‌ బాంద్రాలో వింగ్‌ 3 ఏరియాలోని 1100 చ.అడుగుల విస్తీర్ణం కలిగిన ఫ్లాట్‌ ధర దాదాపు రూ. 5.4 కోట్లు ఉంటుంది. 

క్రికెటర్‌గా మారే క్రమంలో 22 ఏళ్ల యశస్వి చాలా కష్టాలను అనుభవించాడు. కొన్నాళ్లు టెంట్‌లోనూ జీవితం గడిపాడు. తర్వాత అతడి కోసం కుటుంబం యూపీ నుంచి ముంబయికి మారిపోయింది. క్రికెట్‌ శిక్షణ కోసం వెళ్లే సమయంలో పానీ పూరి బండి వద్ద పని చేసినట్లూ వార్తలు వచ్చాయి. జూనియర్‌ లెవల్‌లో తన సత్తా చూపించిన తర్వాత.. జైస్వాల్‌ వెనక్కి తిరిగి చూడలేదు. అండర్ -19 వరల్డ్‌ కప్‌ 2019లో రాణించాడు. దీంతో ఐపీఎల్‌లోకి అడుగు పెట్టే అవకాశం వచ్చింది. తొలిసారే రూ. 2.4 కోట్ల బిడ్‌ దక్కించుకున్నాడు. రాజస్థాన్‌ రాయల్స్ తరఫున 2023 సీజన్‌లో 14 మ్యాచుల్లోనే 625 పరుగులు చేశాడు. ఇప్పుడు ఇంగ్లాండ్‌తో జరుగుతున్న టెస్టు సిరీస్‌లోనూ అతడే టాప్‌ స్కోరర్‌. కేవలం మూడు టెస్టుల్లోనే 545 పరుగులు సాధించాడు.