రెవెన్యూ భూముల లెక్కలు తీయండి.. అధికారులకు మంత్రి పొంగులేటి ఆదేశం

ఈనాడు, హైదరాబాద్‌: గడిచిన 30, 40 ఏళ్ల నుంచి వివిధ అవసరాలకు రెవెన్యూశాఖ ఇతర శాఖలకు కేటాయించిన భూముల లెక్కలు తీయాలని మంత్రి పొంగులేటి శ్రీనివాసరెడ్డి అధికారులను ఆదేశించారు. సోమవారం రాష్ట్ర సచివాలయంలో పలు శాఖల అధికారులతో నిర్వహించిన సమీక్షలో మంత్రి మాట్లాడారు. ‘రెవెన్యూశాఖ గతంలో కేటాయించిన భూముల వివరాలు, వినియోగం, ప్రస్తుత పరిస్థితి తదితర అంశాలపై సమగ్ర నివేదిక తయారు చేయాలి. ప్రధానంగా నీటిపారుదల, అటవీశాఖలకు పెద్ద ఎత్తున భూములు అప్పగించింది. రాష్ట్ర విభజన తరువాత కొన్ని ప్రాజెక్టులు రద్దయ్యాయి. మరికొన్నింటిలో మార్పు చేర్పులు జరిగాయి. ఈ అంశాలను పరిగణనలోకి తీసుకుని భూముల లెక్కలు తేల్చాలి. సీతారామ ఎత్తిపోతలకు ఉమ్మడి ఖమ్మంలో 1,138 ఎకరాల అటవీ భూముల కేటాయింపు ప్రక్రియలో వేగం పెంచాలి. కేశవాపురం తాగునీటి పథకం కోసం రెవెన్యూశాఖ అటవీశాఖకు 1,030 ఎకరాలు ఇచ్చింది. ఈ ప్రాజెక్టు రద్దు అయినందున ఆ భూమిని సీతారామ ఎత్తిపోతలకు బదలాయించాలి’ అని మంత్రి సూచించారు.