మీసాలజెల్ల.. భలే పెరిగావే ఇలా

ఖమ్మం జిల్లా కూసుమంచి మండలంలోని పాలేరు జలాశయంలో ఓ మత్స్యకారునికి సోమవారం 20 కిలోల చేప గాలానికి చిక్కింది. నాయకన్‌గూడెం గ్రామానికి చెందిన మత్స్యకారుడు మేకల పరశురాములు ఆదివారం సాయంత్రం జలాశయం మధ్యలో ఉన్న దేవునిగుట్ట వద్ద గాలం ఏర్పాటు చేసి ఉంచారు. సోమవారం ఉదయం వెళ్లి పరిశీలించగా ‘బండజెల్ల’ అనే రకం చేప గాలానికి చిక్కింది. విక్రయ కేంద్రంలో సాధారణ రకం కంటే ధర ఎక్కువ (కిలో రూ.220) పలకడంతో మత్స్యకారుడు సంతోషం వ్యక్తం చేశారు. పెద్ద చేప దొరకడంతో కొనుగోలు కేంద్రం నిర్వాహకుడు సైతం ఆశ్చర్యంతో ఇలా పట్టుకుని చూపించారు. ‘బండజెల్ల’ స్పెరాట జాతికి చెందిన లాంగ్‌ విస్కర్డ్‌ క్యాట్‌ఫిష్‌ (తినే రకం) చేప అని పాలేరులోని మత్స్య పరిశోధన కేంద్రం ప్రధాన శాస్త్రవేత్త డాక్టర్‌ శ్యాంప్రసాద్‌ తెలిపారు. మీసాలతో ఉండే ఈ చేపలు స్థానిక జలాశయంలో అరుదుగా లభ్యమవుతాయని, కొమ్ముజెల్ల చేపలతో పోలిస్తే పొడవు తక్కువగా, అధిక లావుతో ఇవి ఉంటాయన్నారు.

న్యూస్‌టుడే, కూసుమంచి