తేమ 20% ఉన్నా కొనుగోలు చేయాలి

వీడియో కాన్ఫరెన్స్‌లో కేంద్రమంత్రికి తుమ్మల వినతి

ఈనాడు, హైదరాబాద్‌: తెలంగాణలో వరుస వర్షాలు, భిన్నమైన వాతావరణ పరిస్థితులతో పత్తిలో తేమ 10-12% వరకు ఉంటోందని, 20% వరకు అనుమతించి కొనుగోలు చేసేలా సీసీఐని ఆదేశించాలని రాష్ట్ర వ్యవసాయశాఖ మంత్రి తుమ్మల నాగేశ్వరరావు కేంద్ర వ్యవసాయశాఖ మంత్రి శివరాజ్‌సింగ్‌ చౌహాన్‌ను కోరారు. సోమవారం కేంద్రమంత్రి అన్ని రాష్ట్రాల వ్యవసాయశాఖ మంత్రులతో వీడియో కాన్ఫరెన్స్‌ నిర్వహించారు. ఈ సందర్భంగా తుమ్మల మాట్లాడుతూ..‘ ప్రస్తుతం పత్తిలో 8-10% తేమ ఉంటేనే సీసీఐ కొనుగోళ్లు చేపడుతోంది. తెలంగాణలో ప్రస్తుతం వర్షాలు, చలితో నిర్ణీత తేమ శాతం ఉండడం లేదు. రైతుల ప్రయోజనార్థం ప్రస్తుత నిబంధనలను సడలించాలి. ధరల మద్దతు పథకం కింద పెసర, మినుములు, సోయాబీన్‌ల కొనుగోలుకు అనుమతించాలని పంపిన ప్రతిపాదనలను ఆమోదించాలి. జొన్న, మొక్కజొన్నలను సైతం కొనుగోలు చేసేందుకు ఆదేశాలివ్వాలి’ అని కోరారు.