ఆటోలపై రూ.42 కోట్ల చలానాలు విధించారు

భారత రాష్ట్ర సమితి సర్కార్‌పై ఎంపీ చామల ఆరోపణ

హైదరాబాద్, న్యూస్‌టుడే: భారత రాష్ట్ర సమితి పదేళ్ల పాలనలో ఆటోలపై రూ.42 కోట్ల చలానాలు విధించి డ్రైవర్లను వేధించారని భువనగిరి ఎంపీ చామల కిరణ్‌కుమార్‌రెడ్డి ఆరోపించారు. అధికారంలో ఉన్నప్పుడు ఏనాడూ ఆటో డ్రైవర్లను పట్టించుకోని కేటీఆర్‌.. జూబ్లీహిల్స్‌ ఎన్నిక సమయంలో కొత్త డ్రామాలు చేస్తున్నారని విమర్శించారు. ఆయన మంగళవారం గాంధీభవన్‌లో మాట్లాడుతూ.. ‘మీ హయాంలో ఎన్ని ప్రాజెక్టులు కట్టారో భారత రాష్ట్ర సమితి నేతలు చెప్పాలి. ఆనాడు కేంద్రం, రాష్ట్ర ప్రభుత్వం మధ్య సత్సంబంధాలు లేకపోవడంతో కేంద్రంలోని ప్రతి శాఖ నుంచి రావాల్సిన రూ.వేల కోట్ల నిధులు అగిపోయాయి. కాంగ్రెస్‌ ప్రభుత్వం ఇచ్చిన ప్రతి హామీ అమలుకు చిత్తశుద్ధితో పని చేస్తోంది’ అని అన్నారు.