పిల్లలపై లైంగిక వేధింపులు అత్యంత హేయమైన చర్య

నిందితుడి విడుదలకు ఆదేశాలు జారీచేయలేమన్న హైకోర్టు

ఈనాడు, హైదరాబాద్‌: ప్రభుత్వ బాలల గృహంలో పిల్లలపై లైంగిక వేధింపుల కేసులో సైదాబాద్‌ పోలీసులు అరెస్ట్‌ చేసిన సూపర్‌వైజర్‌ మహమ్మద్‌ రహమాన్‌ సిద్దిఖీ విడుదలకు ఆదేశాలు జారీచేయలేమని హైకోర్టు తేల్చి చెప్పింది. పిల్లలను లైంగిక వేధింపులకు గురిచేయడం అత్యంత హేయమైన చర్య అని.. ఇలాంటి కేసుల్లో అరెస్టయిన వ్యక్తి విడుదలకు ఆదేశించలేమంది. సైదాబాద్‌ పోలీసులు అక్రమంగా నిర్బంధించిన తన సోదరుడు మహమ్మద్‌ రహమాన్‌ సిద్దిఖీని విడుదల చేయాలంటూ అతని సోదరి దాఖలు చేసిన హెబియస్‌ కార్పస్‌ పిటిషన్‌పై జస్టిస్‌ మౌసమీ భట్టాచార్య, జస్టిస్‌ గాడి ప్రవీణ్‌కుమార్‌లతో కూడిన ధర్మాసనం విచారణ చేపట్టింది. పిటిషనర్‌ తరఫు న్యాయవాది వాదనలు వినిపిస్తూ ఆధారాల్లేకుండా పోలీసులు అక్రమంగా నిర్బంధించారని, అంతేకాకుండా కస్టడీలో హింసించారని ఆరోపించారు. ప్రభుత్వ ప్రత్యేక న్యాయవాది స్వరూప్‌ ఊరిళ్ల వాదనలు వినిపిస్తూ వేధింపులకు గురైనవారి కుటుంబ సభ్యుల నుంచి వాంగ్మూలాలు సేకరించామన్నారు. వాదనలను విన్న ధర్మాసనం.. సాక్షుల వాంగ్మూలాలతోపాటు నిందితుడి నేరాంగీకార వాంగ్మూలాన్ని పరిశీలించిన తర్వాత నిందితుడు అత్యంత హేయమైన చర్యకు పాల్పడినట్లు తెలుస్తోందని పేర్కొంది. అంతేకాకుండా నిందితుడిని పోలీసులు కోర్టులో హాజరుపరచగా జ్యుడిషియల్‌ కస్టడీకి ఆదేశాలు జారీ చేసిందని పేర్కొంది. అందువల్ల హెబియస్‌ కార్పస్‌ పిటిషన్‌ పరిధిలో నిందితుడిని హాజరుపరచాలని ఆదేశాలివ్వలేమని పేర్కొంది. కస్టడీలో చిత్రహింసలకు సంబంధించిన ఆరోపణలపై చట్టప్రకారం ప్రత్యామ్నాయ చర్యలు చేపట్టాలంటూ పిటిషన్‌ను కొట్టివేసింది.