అర్హులందరికీ ఇందిరమ్మ ఇళ్లు: పొంగులేటి

జూబ్లీహిల్స్‌ ఎన్నికల ప్రచారంలో మంత్రి పొంగులేటి

ప్రసంగిస్తున్న మంత్రి పొంగులేటి శ్రీనివాసరెడ్డి

రహ్మత్‌నగర్, న్యూస్‌టుడే: అర్హులైన పేదలందరికీ ఇందిరమ్మ ఇళ్లు అందివ్వడమే తమ ప్రభుత్వ ధ్యేయమని రాష్ట్ర రెవెన్యూ, గృహనిర్మాణశాఖ మంత్రి పొంగులేటి శ్రీనివాసరెడ్డి అన్నారు. జూబ్లీహిల్స్‌ నియోజకవర్గం రహ్మత్‌నగర్‌ డివిజన్‌ కార్మికనగర్‌లో పలువురు నాయకులు, కార్యకర్తలు పొంగులేటి సమక్షంలో కాంగ్రెస్‌లో చేరారు. గత ప్రభుత్వం ధనిక రాష్ట్రాన్ని అప్పుల రాష్ట్రంగా మార్చగా.. పేదలకు తాము ఇచ్చిన హామీలను తల తాకట్టు పెట్టైనా అమలు చేస్తున్నామన్నారు. గతంలో కాంగ్రెస్‌ హయాంలోనే పీజేఆర్‌ ఆధ్వర్యంలో పేదలకు ఇళ్ల స్థలాలు ఇచ్చామని, అధికారంలోకి వచ్చిన మొదటి సంవత్సరంలోనే నాలుగున్నర లక్షల ఇందిరమ్మ ఇళ్లు ఇవ్వాలని లక్ష్యంగా పెట్టుకున్నామన్నారు. భారత రాష్ట్ర సమితి ఇతర పార్టీల నుంచి చాపల కృష్ణ, ఆనందరాజు, బాసాటి కృష్ణల ఆధ్వర్యంలో పార్టీలో చేరిన పలువురికి కండువాలు కప్పి ఆహ్వానించారు. ఈ సందర్భంగా కాంగ్రెస్‌ అభ్యర్థి నవీన్‌ యాదవ్‌ను అత్యధిక మెజారిటీతో గెలిపించాలని ఆయన పిలుపునిచ్చారు. కార్యక్రమంలో ఎమ్మెల్యేలు బీర్ల అయిలయ్య, బాలు నాయక్, వేముల వీరేశం, ఎమ్మెల్సీ బల్మూరి వెంకట్, కార్పొరేషన్‌ ఛైర్మన్లు రాంరెడ్డి, రమేశ్‌రెడ్డి, కొత్వాల్, జైపాల్, సీఎన్‌ రెడ్డి, భవాని శంకర్, నాగరాజు పాల్గొన్నారు.