మావోయిస్ట్‌ చీఫ్‌గా దేవ్‌జీ నియామకం అబద్ధం

చంద్రన్న మోసపూరిత ప్రచారాన్ని ఖండించండి
పార్టీ ఒడిశా రాష్ట్ర కమిటీ కార్యదర్శి గణేశ్‌

ఈనాడు, హైదరాబాద్‌: మావోయిస్టు పార్టీ చీఫ్‌ నంబాల కేశవరావు ఎలియాస్‌ బస్వరాజ్‌ మరణానంతరం దేవ్‌జీని ఆ స్థానంలో నియమించినట్లు లొంగిపోయిన కేంద్రకమిటీ సభ్యుడు చంద్రన్న చెప్పింది వాస్తవవిరుద్ధమని ఆ పార్టీ ఒడిశా రాష్ట్ర కమిటీ కార్యదర్శి గణేశ్‌ పేరుతో బుధవారం ప్రకటన వెలువడింది. బస్వరాజ్‌ మరణానంతరం కేంద్రకమిటీ సమావేశం నిర్వహించే పరిస్థితే లేదన్నారు. పోలీసులకు లొంగిపోయిన చంద్రన్న తనకు తాను విప్లవకారుడిగా చెప్పుకొనే హక్కు కోల్పోయారని విమర్శించారు. భవిష్యత్తులో ప్రజల కోసం పనిచేస్తానని ఆయన చెప్పడం నగరవాసి హోదా కోసం వేసుకున్న ముసుగు మాత్రమే అని మండిపడ్డారు. భారత విప్లవోద్యమం ప్రస్తుతం తాత్కాలిక క్లిష్ట పరిస్థితిని ఎదుర్కొంటోందన్నారు. మావోయిస్టు పార్టీ దీన్ని అధిగమించి ముందుకు సాగుతుందని తెలిపారు. నిరుద్యోగం, సామాజిక-ఆర్థిక అసమానతల వంటి సమస్యలను అధిగమించడంలో ప్రభుత్వ యంత్రాంగం విఫలమైనందున ప్రజలు సాయుధ తిరుగుబాటును ఆశ్రయించాల్సిందేనని, విజయం అంతిమంగా ప్రజలదే అనేది చారిత్రక సత్యమని ప్రకటనలో పేర్కొన్నారు.