Uttam: ఆపరేషన్‌ సిందూర్‌పై మేం రాజకీయం చేయడం లేదు: మంత్రి ఉత్తమ్‌

హైదరాబాద్‌: వాయుసేనకు ఫైటర్‌ జెట్స్‌, ఆయుధాలు సరైన సమయానికి అందేలా కేంద్రం చర్యలు తీసుకోవాలని మంత్రి ఉత్తమ్‌ కుమార్‌రెడ్డి అన్నారు. ఆపరేషన్‌ సిందూర్‌లో భారత్‌ ఎన్ని యుద్ధ విమానాలను కోల్పోయిందో ప్రజలకు సమాధానం చెప్పాలన్నారు. ‘‘రఫేల్‌ విమానాలు కూలాయని రాహుల్‌ చెబితే దేశ వ్యతిరేకులు అన్నారు. రఫేల్‌ విమానాలు కూలాయని సీడీఎస్‌ ఒక ఇంటర్వ్యూలో చెప్పారు. సీడీఎస్‌ వ్యాఖ్యలపై ఏం చెప్తారు.. ఆయన్ని దేశ వ్యతిరేకి అంటారా? పాకిస్థాన్‌ ఫైటర్‌ జెట్స్‌ ఎన్ని కూలాయో కూడా స్పష్టం చేయాలి. సరిపడా యుద్ధ విమానాలు లేవు .. ఇది దేశానికి మంచిది కాదు. ఆపరేషన్‌ సిందూర్‌పై కాంగ్రెస్‌ రాజకీయం చేయడం లేదు. యుద్ధ విషయాలు ప్రపంచానికి బహిరంగంగానే చెప్పాలి. విజయాలతో పాటు లోటుపాట్లను కూడా ప్రజలకు చెప్పాలి’’ అని ఉత్తమ్‌ కుమార్‌రెడ్డి అన్నారు.