Malla Reddy: నాపై అక్రమంగా కేసు పెట్టారు: హైకోర్టును ఆశ్రయించిన మల్లారెడ్డి

ఈనాడు, హైదరాబాద్‌: మేడ్చల్‌ జిల్లా శామీర్‌పేట పోలీసులు తనపై నమోదు చేసిన కేసును కొట్టివేయాలని కోరుతూ భారాస ఎమ్మెల్యే, మాజీ మంత్రి మల్లారెడ్డి (Malla Reddy) హైకోర్టును ఆశ్రయించారు. మేడ్చల్‌ మండలం మూడుచింతపల్లి మండలం కేశవాపురం గ్రామంలో భూములను కబ్జా చేశారన్న ఫిర్యాదుపై పోలీసులు కేసు నమోదు చేశారు. తనపై అక్రమంగా నమోదు చేసిన కేసును కొట్టివేయాలని కోరుతూ మల్లారెడ్డి హైకోర్టులో పిటిషన్‌ దాఖలు చేశారు. ఈ పిటిషన్‌ సోమవారం జస్టిస్‌ కె.సురేందర్‌ ముందుకు విచారణకు రాగా ప్రజాప్రతినిధుల కేసును విచారించే బెంచ్‌ ముందు ఈ పిటిషన్‌ను ఉంచాలని రిజిస్ట్రీని ఆదేశిస్తూ విచారణను వాయిదా వేశారు.