వేతనాలు లేవు.. సర్వీసు భద్రత కరవు

న్యాయం చేయాలని సీఎంకు పూర్వ వీఆర్వోల వినతి 

ఈనాడు, హైదరాబాద్‌: రెవెన్యూశాఖ నుంచి తమకు ఐచ్ఛికాలు కల్పించకుండా బలవంతంగా ఇతర శాఖల్లోకి మార్చి తీవ్ర అన్యాయం చేశారని పూర్వ గ్రామ రెవెన్యూ అధికారులు(వీఆర్వో) ఆవేదన వ్యక్తం చేస్తున్నారు. రెవెన్యూశాఖపై సీఎం రేవంత్‌రెడ్డి శనివారం సమీక్షించనున్న నేపథ్యంలో తమ కీలక సమస్యలను పరిష్కరించాలని అభ్యర్థిస్తున్నారు. ఈ మేరకు పూర్వ వీఆర్వోల సంఘాలు శుక్రవారం విడుదల చేసిన ప్రకటనలో పలు సమస్యలను ప్రభుత్వం ముందు ఉంచాయి. ‘ఉమ్మడి ఖమ్మం, మహబూబ్‌నగర్‌, నల్గొండ జిల్లాల్లో నెలల తరబడి వేతనాలు లేవు. మాతృశాఖలో ఉన్న సీనియారిటీని ఇప్పుడు పనిచేస్తున్న శాఖలో పరిగణనలోకి తీసుకోవడం లేదు. వీఆర్వో వ్యవస్థ రద్దు నాటికి అర్హతలను బట్టి పదోన్నతి కల్పించలేదు. రెవెన్యూశాఖలో మిగులు సిబ్బందిగా నిర్ధారించి ‘రీడిప్లాయిమెంట్‌’ విధానంలో బదలాయించి కేడర్‌, సేవల కేటాయింపును ఇష్టారీతిన చేశారు. ఇతర శాఖల్లో జూనియర్‌ అసిస్టెంట్‌ తత్సమాన పోస్టుల్లో నియమించాల్సి ఉండగా తోటమాలి, వార్డు ఆఫీసర్‌, రికార్డు అసిస్టెంట్‌, స్టోర్‌ కీపర్‌, కంప్యూటర్‌ ఆపరేటర్‌, హాస్టల్‌ వర్కర్లుగా నియమించారు’ అని పేర్కొన్నారు. సీఎం స్పందించి న్యాయం చేయాలని కోరారు.