పసుపు పంటకు రికార్డు ధర

నిజామాబాద్‌ మార్కెట్‌లో క్వింటా రూ.14,255

నిజామాబాద్‌ వ్యవసాయం, న్యూస్‌టుడే: నిజామాబాద్‌ వ్యవసాయ మార్కెట్‌ యార్డులో బుధవారం పసుపు పంటకు రికార్డు స్థాయి ధర దక్కింది. ఈ సీజన్‌లో ముందు నుంచి ఊపు మీదున్న ధరలు రోజురోజుకు ఎగబాకుతున్నాయి. నిజామాబాద్‌ జిల్లా బాల్కొండ మండలానికి చెందిన పన్నాల మహిత అనే మహిళా రైతుకు చెందిన 17 క్వింటాళ్ల కొమ్ముకు గరిష్ఠంగా క్వింటాకు రూ.14,255 చొప్పున ధర పలికింది. ఇదే ఈ సీజన్‌ అత్యధిక ధరగా మార్కెటింగ్‌ సెలక్షన్‌ గ్రేడ్‌ కార్యదర్శి వెంకటేశం వెల్లడించారు. పదమూడేళ్లకు మళ్లీ పసుపు పంటకు డిమాండ్‌ వచ్చింది. 2011లో క్వింటా ఆల్‌టైమ్‌ రికార్డు ధర రూ.16,166 పలికింది. ఆ తర్వాత రూ.6-7 వేల మధ్య మాత్రమే లభిస్తోంది.