పశువుల మేతగా మారుతున్న ఆరుగాలం పంట

ఆరుగాలం శ్రమించి పంట పండించే రైతన్నకు కన్నీరే మిగులుతోంది. ఈ యాసంగి సీజన్లో భూగర్భ జలాలు అడుగంటి, సాగునీటి ప్రాజెక్టుల నుంచి కూడా నీరు అందక పంటలు పొట్టకు వచ్చిన దశలో ఎండిపోతున్నాయి. జనగామ జిల్లా రఘునాథపల్లి మండలం మంగళిబండ తండాలో రైతు గుగులోతు పూల్‌సింగ్‌ మూడు ఎకరాల వరి పంట నీళ్లు లేక ఇలా ఎండిపోయింది. పెట్టుబడి కోసం రూ.75 వేలు అప్పు చేశామని రైతు ఆవేదన వ్యక్తం చేశారు. చేతికొస్తాయనుకున్న కాస్త తిండిగింజలూ ఎండి ఇలా పశువులకు దాణాగా మారుతున్నాయని వాపోతున్నారు. ఇక్కడి రైతులందరిదీ ఇదే పరిస్థితి. భూగర్భజలాలు పాతాళంలోకి చేరి చేయూత కరవై కర్షకులు కన్నీటి పర్యంతం అవుతున్నారు. 

ఈనాడు, హనుమకొండ, న్యూస్‌టుడే, రఘునాథపల్లి