సీఎం రేవంత్‌రెడ్డి ఇంటి వద్ద వ్యక్తి ఆత్మహత్యాయత్నం

భూపాలపల్లికి చెందిన కాంగ్రెస్‌ కార్యకర్తగా గుర్తింపు

ఫిలింనగర్‌, న్యూస్‌టుడే: హైదరాబాద్‌ జూబ్లీహిల్స్‌లోని ముఖ్యమంత్రి రేవంత్‌రెడ్డి నివాసం వద్ద శనివారం ఓ వ్యక్తి ఒంటిపై పెట్రోల్‌ పోసుకొని ఆత్మహత్యకు ప్రయత్నించాడు. అక్కడే ఉన్న పోలీసులు వెంటనే స్పందించి అతనిపై నీరు పోయడంతో ప్రమాదం తప్పింది. ఆపై అతన్ని జూబ్లీహిల్స్‌ ఠాణాకు తరలించారు. విచారణలో అతడిని భూపాలపల్లికి చెందిన కాంగ్రెస్‌ కార్యకర్త కృష్ణసాగర్‌గా గుర్తించారు. రేవంత్‌రెడ్డి సారథ్యంలో పార్టీ గెలుపు కోసం పని చేశానని, ప్రస్తుతం అధికారంలోకి వచ్చినా తనకు ఎలాంటి పదవులు దక్కలేదని, పార్టీలోకి కొత్తగా వచ్చిన వారందరికీ ప్రాధాన్యం ఇస్తున్నారని ఆవేదన వ్యక్తం చేశాడు. ఇది భరించలేక సీఎం ఇంటి వద్దే చనిపోవాలని ప్రయత్నించానని చెప్పాడు. పోలీసులు అతనికి కౌన్సెలింగ్‌ ఇచ్చి పంపించేశారు.