ఐదేళ్ల కనిష్ఠానికి సాగర్‌ జలాశయం

నాగార్జునసాగర్‌, న్యూస్‌టుడే: నాగార్జునసాగర్‌ జలాశయ నీటిమట్టం కనీస స్థాయికి పడిపోయింది. ఈ ఏడాది కృష్ణా పరీవాహక ఎగువ ప్రాంతంలో వర్షాలు సరిపడినంతగా పడకపోవడంతో సాగర్‌ జలాశయం గత ఐదేళ్లలో ఎప్పుడూ లేనంతగా 510.70 అడుగుల కనీస నీటిమట్టానికి తగ్గిపోయింది. డ్యాంలో నీరు లేకపోవడంతో ప్రభుత్వం రైతులను వరి సాగు చేయవద్దని ప్రకటించడంతో పంట సాగు చేయలేదు. ప్రస్తుతం సాగర్‌ జలాశయంలో నీటి నిల్వను పరిశీలిస్తే మే నెలలో తాగునీటిని అందించడం కూడా కష్టంగా కనిపిస్తోంది. అత్యవసర పరిస్థితుల్లో తాగునీటి కోసం జలాశయంలో నీటిని 505.00 అడుగుల మట్టానికి వచ్చే వరకు విడుదల చేయాలన్న ఆలోచనలో కేఆర్‌ఎంబీ ఉన్నట్లు సమాచారం. బుధవారం మధ్యాహ్నానికి జలాశయంలో 510.70 అడుగుల నీరుండగా, ఇది 132.86 టీఎంసీలకు సమానం. (సాగర్‌ గరిష్ఠ నీటిమట్టం 590.00 అడుగులు. ఇది 312.5050 టీఎంసీలకు సమానం).