అట్టహాసంగా గరుడాధివాసం పూజలు

భద్రాచలం, న్యూస్‌టుడే: భద్రాచలం సీతారామచంద్ర స్వామి ఆలయంలో శ్రీరామనవమి కల్యాణ బ్రహ్మోత్సవంలో భాగంగా ఆదివారం గరుడాధివాసం నిర్వహించారు. అత్యంత పవిత్రమైన వస్త్రంపై ధ్వజపటాన్ని జీయర్‌స్వామి మఠం వద్ద లిఖించారు. బ్రహ్మోత్సవాల్లో ఎలాంటి ఆటంకాలు కలగకుండా గరుత్మంతుడు రక్షగా ఉంటాడని దేవనాథ రామానుజ జీయర్‌స్వామి తెలిపారు. ఈ పటాన్ని మంగళ వాయిద్యాలు కోలాటాల నడుమ ఆలయానికి తీసుకొచ్చి అక్కడ ఉంచడాన్ని అధివాసంగా పేర్కొన్నారు. అగ్ని సమీకరణ క్రతువు భక్తిప్రపత్తులను చాటింది. గరుడమూర్తికి పొంగలిని ప్రసాదంగా సమర్పిస్తారు. ఈ వేడుకతో పాటు భేరి పూజ, దేవతాహ్వానం, అగ్ని ప్రతిష్ఠాపన ఉంటుంది. సోమవారం ధ్వజారోహణం చేస్తారని ఈవో రమాదేవి తెలిపారు.