కేసుల వివరాలు అందించిన పోలీసులు

భాజపా పిటిషన్‌పై విచారణను మూసివేసిన హైకోర్టు

ఈనాడు, హైదరాబాద్‌: భాజపా తరఫున పార్లమెంట్‌ ఎన్నికల్లో పోటీ చేస్తున్న అభ్యర్థులపై రాష్ట్రవ్యాప్తంగా ఉన్న కేసుల వివరాలను పోలీసులు అందజేసినట్లు ఆ పార్టీ ప్రధాన కార్యదర్శి మంగళవారం హైకోర్టుకు నివేదించారు. దీంతో ఈ పిటిషన్‌పై విచారణను హైకోర్టు మూసివేసింది. తమ పార్టీ తరఫున పోటీ చేస్తున్న అభ్యర్థులపై ఉన్న కేసుల వివరాలను అందజేయాలని డీజీపీకి వినతిపత్రం ఇచ్చినా స్పందించకపోవడంతో భాజపా ప్రధాన కార్యదర్శి దుగ్యాల ప్రదీప్‌కుమార్‌ ఇటీవల హైకోర్టులో పిటిషన్‌ దాఖలుచేశారు. దీనిపై జస్టిస్‌ బి.విజయ్‌సేన్‌రెడ్డి విచారణ చేపట్టారు. పిటిషనర్‌ తరఫు న్యాయవాది వాదనలు వినిపిస్తూ డీజీపీకి మార్చి 7న, 14న వినతిపత్రాలు ఇచ్చినా వివరాలు అందజేయలేదన్నారు. దీనిపై న్యాయమూర్తి స్పందిస్తూ ఇది సమంజసమైన అభ్యర్థనేనని, దీనిపై వివరణ తెలుసుకుని చెప్పాలంటూ ప్రభుత్వ న్యాయవాదికి ఆదేశాలు జారీచేశారు. పోలీసులు వివరాలు అందజేశారని పిటిషనర్‌ తరఫు న్యాయవాది భోజన విరామం తరువాత చెప్పడంతో విచారణను మూసివేస్తూ న్యాయమూర్తి ఉత్తర్వులు జారీ చేశారు.