సమస్య గుర్తించక ముందే మరమ్మతులెలా నిర్ణయిస్తారు..?

ఈఎన్సీపై ప్రభుత్వ వర్గాల ఆగ్రహం..!

ఈనాడు, హైదరాబాద్‌: మేడిగడ్డ బ్యారేజీ మరమ్మతు పనులను గుత్తేదారులకు అప్పగించేందుకు నీటిపారుదలశాఖ నిర్ణయించినట్లు జరుగుతున్న ప్రచారంపై ప్రభుత్వ పెద్దలు ఆగ్రహంతో ఉన్నట్లు తెలిసింది. నీటిపారుదలశాఖ ఇంజినీర్‌ ఇన్‌ చీఫ్‌(ఈఎన్సీ) అనిల్‌కుమార్‌ ఇటీవల గుత్తేదారు సంస్థలతో సమావేశం నిర్వహించడం, ఆ వెంటనే మరమ్మతులకు నిధుల కేటాయింపుపై నిర్ణయం తీసుకున్నారంటూ వార్తలు రావడంపై ఆరా తీస్తున్నట్లు సమాచారం. బ్యారేజీ కుంగుబాటుకు కారణాలు, మరమ్మతులకు తీసుకోవాల్సిన చర్యలపై ఎన్డీఎస్‌ఏ అధ్యయనం చేస్తుండగా.. ఇప్పటి వరకు సిఫార్సులేవీ చేయలేదు. విజిలెన్స్‌ విచారణ కూడా కొనసాగుతోంది. ఈ తరుణంలో ఈఎన్సీ ఏ విధంగా మరమ్మతులకు నిర్ణయం తీసుకుంటారని ప్రభుత్వ వర్గాలు గుర్రుగా ఉన్నట్లు తెలిసింది. దీనిపై వివరణ కూడా కోరినట్లు చెబుతున్నారు. సీఎం రేవంత్‌రెడ్డి, నీటిపారుదలశాఖ మంత్రి ఉత్తమ్‌కుమార్‌రెడ్డి, శాఖ కార్యదర్శి రాహుల్‌ బొజ్జా ఈఎన్సీపై ఆగ్రహం వ్యక్తం చేసినట్లు వినికిడి.