నేటి నుంచి యాదాద్రీశుడి జయంతి ఉత్సవాలు

యాదాద్రి ఆధ్యాత్మికవాడలో ఆదివారం భక్తుల వాహనాల రద్దీ

యాదగిరిగుట్ట, న్యూస్‌టుడే: యాదాద్రి క్షేత్రంలో ఈ నెల 20 నుంచి 22 వరకు నారసింహుడి వార్షిక జయంతి మహోత్సవాల నిర్వహణకు ఏర్పాట్లు పూర్తయ్యాయి. సోమవారం ఉదయం 8:30 గంటలకు విష్వక్సేన ఆరాధన, స్వస్తివాచనం, సాయంత్రం జరిగే అంకురార్పణ క్రతువులతో ఈ వేడుకలు ప్రారంభమవుతాయని ప్రధాన పూజారి నల్లందిగల్‌ లక్ష్మీనరసింహాచార్య తెలిపారు. 

ఆదివారం యాదాద్రి క్షేత్ర సందర్శనకు భక్తులు పోటెత్తారు. ఆధ్యాత్మిక వాడలోని రహదారులు, పార్కింగ్‌ ప్రాంతం, వ్రత మండపం, పుష్కరిణి ప్రాంగణం, మండపాలు కిక్కిరిశాయి. రద్దీ అధికంగా ఉండటంతో బ్రేక్‌ దర్శనాన్ని రద్దు చేసినట్లు ఆలయ ఈవో తెలిపారు. వివిధ విభాగాల ద్వారా ఆలయానికి రూ.85,33,262 ఆదాయం సమకూరింది.