ఏడునూతుల బావి.. ఆ ఊరి జలతావి

ఈ కాలంలో సాధారణంగా బావుల్లోని నీటిని నేరుగా ఎవరూ తాగడం లేదు. కానీ జనగామ జిల్లా కొడకండ్ల మండలంలోని ఏడునూతుల ఊరి ప్రజలు మాత్రం ఓ బావిలో నీటిని దోసిట పట్టి తాగుతారు. గ్రామంలోని పెద్దచెరువు వద్ద ఉన్న ఈ బావిని సుమారు 200 ఏళ్ల క్రితం ఏడుగురు అక్కాచెల్లెళ్లు కలిసి తవ్వించారని తమ పూర్వీకులు చెప్పినట్లు 92 ఏళ్ల వృద్ధుడు అంజయ్య వివరించారు. జలతావి అయిన ఈ బావి పేరు మీదుగానే గ్రామానికి ఏడునూతులు అనే పేరొచ్చిందని చెబుతుంటారు. ఊరికి మిషన్‌ భగీరథ ద్వారా ఫిల్టర్‌ నీరొచ్చినా ఈ బావి నీటిని తాగేందుకే గ్రామస్థులు ఇష్టపడతారు. వేసవిలోనూ ఇది ఇంకదు. నీటి విలువ తెలిసేలా గ్రామస్థులు తోడేందుకు బొక్కెన మాత్రమే వాడుతున్నారు. మోటార్లు వాడితే అవసరానికి మించి నీరు వృథా అవుతుందని చెబుతున్నారు.

ఈనాడు, హనుమకొండ, న్యూస్‌టుడే, కొడకండ్ల