Ukraine: జెండా ఊపుతూ ఉక్రెయిన్‌కు మద్దతు.. బాలుడికి ఊహించని గిఫ్ట్‌ ఇచ్చిన ఆర్మీ!

ఇంటర్నెట్‌ డెస్క్‌: గడిచిన రెండేళ్లుగా ఉక్రెయిన్‌ (Ukraine)- రష్యా(Russia) మధ్య యుద్ధం కొనసాగుతున్న తరుణంలో ఓ ఆసక్తికర ఘటన చోటుచేసుకుంది. చాలా కాలంగా ఉక్రెయిన్‌ సైన్యానికి మద్దతు తెలుపుతున్న ఓ బాలుడిని చూసి అధికారులు ఆశ్చర్యపోయారు. చివరకు హెలికాప్టర్‌లో ఆ బాలుడి వద్దకు వెళ్లి అతడిని సర్‌ప్రైజ్‌ చేశారు.

యుద్ధం కొనసాగుతోన్న ప్రాంతంలో నివసిస్తోన్న ఓ బాలుడు.. ఉక్రెయిన్‌ ఆర్మీకి చెందిన హెలికాప్టర్లు శబ్దం వినగానే అప్రమత్తమయ్యేవాడు. ఇంటి నుంచి బయటకు వచ్చి ఉక్రెయిన్‌ జెండాను ఊపుతూ సైనికులకు తన మద్దతు తెలిపేవాడు. ఇలా కొంతకాలంగా కొనసాగిస్తూనే ఉన్నాడు. బాలుడి చేస్తున్న ఆ పని.. సైనికుల హృదయాలను హత్తుకుంది. అతడి ఉత్సాహాన్ని చూసి ఉప్పొంగిపోయిన సైనికులు.. ఎలాగైనా అతడిని కలవాలని నిర్ణయించుకున్నారు. అలా ఓ రోజు బాలుడు ఉంటున్న ప్రదేశానికి రెండు హెలికాప్టర్లు వచ్చాయి. కిందకు దిగిన ఓ హెలికాప్టర్‌ నుంచి బయటకు వచ్చిన ఓ సైనికుడు.. బాలుడి దగ్గరకు వెళ్లి స్వీట్లు, బొమ్మలు, ఆహారం అందించి కృతజ్ఞతలు తెలిపాడు.

దక్షిణ చైనా సముద్రంలో పోటీగా డ్రాగన్‌ కాంబాట్‌ పెట్రోల్స్‌..!

పైనున్న మరో ఆర్మీ హెలికాప్టర్‌ చక్కర్లు కొడుతూ ఈ దృశ్యాలను చిత్రీకరించింది. వీటిని ఉక్రెయిన్‌ డిఫెన్స్‌ ఫోర్స్‌ తన అధికారిక ఇన్‌స్టాగ్రామ్‌ ఖాతాలో పోస్ట్‌ చేసింది. ఈ రోజును ఆ బాలుడు ఎప్పటికీ గుర్తుంచుకుంటాడంటూ పేర్కొంది. సామాజిక మాధ్యమాల వేదికగా పంచుకున్న ఈ వీడియో ప్రస్తుతం వైరల్‌గా మారింది. ఉక్రెయిన్‌ జెండాను ఊపుతూ మైదానం చుట్టూ పరిగెడుతున్న ఈ బాలుడిని చూసి నెటిజన్లు కూడా మద్దతుగా స్పందిస్తున్నారు. ఇరు దేశాల మధ్య శాంతి నెలకొనాలని కోరుకుంటూ కామెంట్లు చేస్తున్నారు.