USA: కాంగ్రెస్‌ బ్యాంకు ఖాతాల వ్యవహారంపైనా అమెరికా వ్యాఖ్యలు!

న్యూయార్క్‌: దిల్లీ సీఎం కేజ్రీవాల్‌ (Arvind Kejriwal) అరెస్టుపై స్పందించి భారత్‌ నుంచి సమన్లు అందుకున్న అమెరికా తాజాగా కాంగ్రెస్‌ పార్టీ బ్యాంకు ఖాతాలపైనా అనవసర వ్యాఖ్యలు చేసింది. కేజ్రీవాల్‌ అరెస్టు విషయంలో స్పందించడంపై భారత్‌ అభ్యంతరం వ్యక్తం చేయడం పట్ల మాట్లాడుతూ ఆ దేశ విదేశాంగ శాఖ అధికార ప్రతినిధి మాథ్యూ మిల్లర్‌ కాంగ్రెస్‌ (Congress) ప్రస్తావననూ తీసుకొచ్చారు. ఈ కేసుల్లో నిష్పాక్షిక, పారదర్శక, కాలావధితో కూడిన విచారణను తాము కోరుకుంటున్నామంటూ మన దేశ అంతర్గత విషయాల్లో అనవసరంగా జోక్యం చేసుకునే ప్రయత్నం చేశారు.

‘‘ఎన్నికల ప్రచారాన్ని అడ్డుకునేలా తమ బ్యాంకు ఖాతాలను పన్ను విభాగం స్తంభింపజేసిందంటూ కాంగ్రెస్‌ పార్టీ చేస్తున్న ఆరోపణలూ మా అవగాహనలో ఉన్నాయి. అరవింద్‌ కేజ్రీవాల్‌ అరెస్టు సహా ఈ కేసులన్నింటిలో తీసుకుంటున్న చర్యలను మేం నిశితంగా గమనిస్తాం’’ అని మిల్లర్‌ వ్యాఖ్యానించారు.

కేజ్రీవాల్‌ అరెస్టుపై వాషింగ్టన్‌ చేసిన వ్యాఖ్యలను ఖండిస్తూ బుధవారం భారత్‌ తీవ్ర నిరసన తెలిపిన విషయం తెలిసిందే. దిల్లీలోని అమెరికా తాత్కాలిక డిప్యూటీ చీఫ్‌ ఆఫ్‌ మిషన్‌ గ్లోరియా బెర్బేనాకు విదేశీ వ్యవహారాల శాఖ ఈ మేరకు సమన్లు జారీ చేసింది. దక్షిణ బ్లాకులోని విదేశాంగశాఖ కార్యాలయంలో 30 నిమిషాల పాటు అధికారులతో ఆమె సమావేశమయ్యారు. దౌత్య సంబంధాల్లో ఆయా దేశాలు ఇతరుల సార్వభౌమాధికారం, అంతర్గత వ్యవహారాలను గౌరవించాలని తాము భావిస్తున్నామని భారత్‌ తెలిపింది. దీనిపై అమెరికా తిరిగి స్పందిస్తూ కాంగ్రెస్‌ ఖాతాల ప్రస్తావననూ తీసుకురావడం గమనార్హం.

మాల్దీవుల గొంతు తడిపిన చైనా

భారత్‌లోని ప్రతిపక్ష నేత అరెస్టుకు సంబంధించిన నివేదికలను నిశితంగా పరిశీలిస్తున్నామని, ఈ కేసులో పారదర్శక విచారణను ప్రోత్సహిస్తున్నామని అమెరికా విదేశాంగశాఖ అధికార ప్రతినిధి మంగళవారం ఓ ప్రశ్నకు బదులిచ్చారు. అంతకు ముందు జర్మనీ సైతం కేజ్రీవాల్‌ అరెస్టుపై ఓ ప్రకటన విడుదల చేసింది. తాజాగా కాంగ్రెస్‌ పార్టీ బ్యాంకు ఖాతాలపైనా అగ్రరాజ్యం స్పందించింది. ఇలా మన అంతర్గత వ్యవహారాలపై ఇతర దేశాలు స్పందించడాన్ని దిల్లీ తీవ్రంగా పరిగణిస్తోంది. ఎప్పటికప్పుడు దీటుగా బదులిస్తోంది.