విమానంలో నగ్నంగా పరుగులు.. హడలెత్తిన ప్రయాణికులు

ఇంటర్నెట్‌ డెస్క్‌: విమానంలో కొందరు వ్యక్తుల ప్రవర్తన తోటి ప్రయాణికులను తీవ్ర ఇబ్బందులకు గురిచేస్తుంది. అత్యవసర ద్వారాన్ని తెరవడం, సిబ్బందిని గాయపరచడం వంటివి తరచూ వింటూనే ఉన్నాం. తాజాగా ఆస్ట్రేలియాకు చెందిన ఓ విమానంలో ప్రయాణికుడు నగ్నంగా పరుగులు తీశాడు. అంతేకాకుండా సిబ్బందిని కిందకు తోసేసి గందరగోళం సృష్టించాడు. ఈ ఘటన వర్జిన్‌ ఆస్ట్రేలియా (Virgin Australia flight) విమానంలో చోటుచేసుకొంది. అసలేం జరిగిందంటే..

ఆస్ట్రేలియాలోని పెర్త్‌ నుంచి మెల్‌బోర్న్‌కు VA696 విమానం సోమవారం రాత్రి బయలుదేరింది. విమానం టేకాఫ్‌ అయిన కాసేపటికి ఓ ప్రయాణికుడు వింతగా ప్రవర్తించాడు. తన ఒంటిపై ఉన్న దుస్తులను తొలగించి నగ్నంగా విమానంలో అటూ, ఇటూ పరిగెత్తాడు. అడ్డుకున్న సిబ్బందిని కింద పడేశాడు. అతడి చర్యకు తోటి ప్రయాణికులు హడలెత్తారు. దీంతో విమానాన్ని అత్యవసరంగా వెనక్కి మళ్లించాల్సి వచ్చింది.

ఆ విషాదం మరువకముందే.. టైటాన్‌ తరహాలో మరో సాహస యాత్ర..!

విమాన సిబ్బంది అందించిన సమాచారం మేరకు ఎయిర్‌పోర్టుకు చేరుకున్న పోలీసులు ఆ వ్యక్తిని అదుపులోకి తీసుకున్నారు. అయితే.. ఆ వ్యక్తి అలా ప్రవర్తించడానికి గల కారణాలు తెలియరాలేదు. ఈ ఘటనపై ఎయిర్‌లైన్స్‌ స్పందిస్తూ.. ‘‘ప్రయాణికులకు కలిగిన అసౌకర్యానికి చింతిస్తున్నాం. ఈ ఘటనలో ఎవరికీ గాయాలు కాలేదు’’ అని ప్రకటనలో పేర్కొంది.