Bridge collapse:: ఆ నౌకలోని సిబ్బంది అంతా భారతీయులే!

వాషింగ్టన్: అమెరికాలోని బాల్టిమోర్‌ నగరంలో భారీ నౌక ఢీకొనడంతో బ్రిడ్జ్‌ కూప్పకూలిన విషయం తెలిసిందే. సింగపూర్‌కు చెందిన ఆ కార్గో షిప్‌లో 22 మంది సిబ్బంది ఉన్నారు. వీరంతా భారతీయులేనని సదరు కంపెనీ వెల్లడించింది. సింగపూర్‌కు చెందిన గ్రీస్‌ ఓషన్‌ ప్రైవేట్‌ లిమిటెడ్‌ కార్గో నౌక ‘దాలీ’ బాల్టిమోర్‌ నుంచి కొలంబోకు బయలుదేరింది. మధ్యలో అర్ధరాత్రి దాదాపు 1.30గంటల సమయంలో ఫ్రాన్సిస్‌ స్కాట్‌ కీ బ్రిడ్జ్‌లోని ఓ పిల్లర్‌ను ఢీకొట్టింది. ఆ సమయంలో ఇద్దరు పైలట్లు విధుల్లోనే ఉన్నారు. అయితే, ప్రమాదానికి గల కారణాలు మాత్రం తెలియరాలేదు. ఈ ప్రమాద ఘటనపై అమెరికా దర్యాప్తు మొదలుపెట్టింది. ఇందుకు నౌక సిబ్బంది పూర్తిగా సహకరిస్తున్నారని దర్యాప్తు సంస్థలు వెల్లడించాయి.

నౌక బ్రిడ్జిని ఢీకొనడంతో ఫ్రాన్సిస్‌ స్కాట్ కీ బ్రిడ్జ్‌ కూలిపోయింది. ఆ సమయంలో వంతెనపై ఉన్న పలు వాహనాలు నదిలో పడిపోయినట్లు తెలుస్తోంది. దాదాపు 20 మంది గల్లంతైనట్లు సమాచారం. దీంతో పటాప్‌స్కో నది మీదుగా రాకపోకలు నిలిచిపోయాయి.