అమెరికాలో ముగ్గురు బంధువులను కాల్చి చంపిన భారతీయ విద్యార్థి

అరెస్టు చేసిన పోలీసులు

 న్యూయార్క్‌: అమెరికాలో భారతీయ విద్యార్థి ఓం బ్రహ్మభట్‌ (23) తన తాత, అవ్వ, మామలను హత్య చేశాడు. న్యూజెర్సీలోని ఓ అపార్ట్‌మెంట్‌లో ఈ దారుణం చోటు చేసుకుంది. పోలీసులు నిందితుడిని అరెస్టు చేశారు. ఈ విషయాన్ని పోలీసులు, స్థానిక మీడియా వెల్లడించింది. దిలీప్‌కుమార్‌ బ్రహ్మభట్‌ (72), బిందు బ్రహ్మభట్‌ (72), యశ్‌కుమార్‌ బ్రహ్మభట్‌ (38)లను.. ఓం కాల్చి చంపినట్లు పోలీసులు తెలిపారు. నిందితుడిపై మూడు హత్యలకు పాల్పడ్డాడని, ఆయుధాన్ని కలిగి ఉన్నాడని ఆరోపిస్తూ అభియోగాలు మోపినట్లు వివరించారు. గుజరాత్‌ నుంచి వలస వచ్చిన ఓం.. బాధితులతో కలిసి నివసిస్తున్నాడు. సంఘటన జరిగిన ప్రదేశానికి తాము చేరుకున్న సమయానికి అతను అక్కడే ఉన్నాడని పోలీసులు చెప్పారు. కాల్పులకు ఉపయోగించిన తుపాకీని ఆన్‌లైన్‌లో కొనుగోలు చేసినట్లు నిందితుడు తెలిపారన్నారు.